西班牙前景未算黯淡

猪拉多纳

有陣時球迷就係咁「忽然一致」，當伊比利亞半島嘅足球強國紛紛遭到滑鐵盧、甚至小組賽未踢完已經出局，成日會聽到呢幾句：「唔係馬後炮，一早唔睇好」、「輸個教練啦，都冇Plan B」、更有人話「王朝末落了」添。

葡萄牙形勢「牙煙」，依家連較似樣嘅後備也冇，單靠C朗就係咁，連軍醫都勸佢抖抖！執筆時葡國兵仍未進行小組第二輪比賽，都仲有數講嘅！
鬥牛兵依然有質量

相反過去六年盡攬世界大賽之西班牙更快「執包袱」，仲要只踢兩場波就畀人狂轟七球，何其悲壯，此時此刻，你馬上斷言狂牛兵團「王朝末落」？我又唔係咁睇！好似德國、巴西屹立球壇數十載，都唔係一帆風順，鬥牛兵呢六、七年間威到盡，但極其量叫做打咗幾場漂亮大戰矣，今番跌一跌再翻身，絕對有利真正朝代之建立。其次，球壇上目前叫價至少三千萬歐元貨色嘅搶手貨，鬥牛兵依然佔大多數，各大豪門爭相搶購，證明實力得到認同；再者今次只是計錯數，教練迪保斯基用感情去揀人腳，只要理性一啲，我敢講馬上可回歸勁旅本色！

計錯數嘅又點只得迪保斯基，可能仲有一啲球衣店舖，鬥牛戰衣怕且割價拋售都未必有人要！