德國強勢追殺加納

猪拉多纳

從未如此團結過

世盃G組次輪分組賽，奪標熱門之一嘅德國於福塔雷薩卡斯特勞球場進行衝冠第2擊迎戰加納，首輪大勝葡萄牙嘅德國乘勝追擊，爭取提早鎖定出線資格，面對剛遭挫敗、傳出內訌又要焗攻嘅加納，可望強勢再下一城，推介1.9倍讓球主勝。

（TVB 13及19、now 818及840周日凌晨3時直播）
4中堅奇陣威力勁

德國於分組賽首戰輕描淡寫大勝葡萄牙4比0，係首輪表現最對辦嘅強隊之一，領隊勒夫嘅4中堅433陣式為球迷帶嚟驚喜，事實上呢個陣式係佢同球隊首席分析師施真泰拿，針對巴西酷熱氣候共同苦思出嚟嘅「奇陣」，4中堅基本上喺絕大部分時間都同中場嘅拿姆、卻奧斯保持緊密聯系嘅幾個四方形，拿姆負責包抄兩閘空缺，卻奧斯發起轉守為攻，另一中場基迪拉負責搶截工作，加上注重控球，令防守球員有足夠空間輪流回氣。前面3名攻擊手奧斯爾、湯馬士梅拿同馬里奧葛斯則不停交換位置，呢個陣式喺對葡萄牙之役發揮巨大威力。

除咗奇陣，德國今屆最強武器係團結，記得06德國世盃，球隊喺奇連士文帶領下空前團結，最終雖然只得季軍，但整體精神面貌令人難忘。到上屆南非世盃，中場舒韋恩史迪加就曾經抱怨話國家隊球員互相支持度不及4年前。嚟到今屆德軍再以團結為大前提，駐地放棄豪華酒店而入住度假村，等球員間有更多一起活動時間，平日不斷播放德軍百年來喺國際大賽嘅威水片段，令球員更加熱血。
黑星焗攻衰多二錢

黑柴好記得首仗對葡萄牙時，曉姆斯接應卻奧斯角球為德國頂成2比0，佢入波後第一時間衝向場邊同未有落場嘅隊友分享喜悅，而包括高路斯、舒韋恩史迪加、普多斯基同維丹費拿等老將，亦帶動全體後備席職球員跳起衝向曉姆斯，互相擁抱慶祝。正如領隊勒夫所講，德國隊23名球員無分正副，球員亦將個人榮譽同紀錄擱下，目標一致齊心爭勝衝冠。

與德軍嘅團結相比，「黑星軍團」加納大營氣氛卻走向另一極端，除首輪遭美國絕殺士氣受挫外，陣中兩名大牌球星奇雲保定同艾辛都對首輪任後備表達強烈不滿，甚至拒絕出席記者會。今仗領隊艾卡華斯艾比亞決定如佢哋所願，但艾辛體能速度大不如前，奇雲保定則傷愈冇耐狀態一般，加上首戰落敗後想出線就要焗攻，面對德國只有輸得更慘更快。
MARK實佢：德國中場 卻奧斯

德國領隊勒夫今屆推出433新陣，卻奧斯肩負由守轉攻重任，一躍成為球隊樞紐，憑出色控球及一流傳送，於首仗對葡萄牙貢獻咗兩次助攻，係德軍除連中三元嘅湯馬士梅拿外，表現最省鏡的一人。
MARK實佢：加納中場 奇雲保定

柏林出生，年輕時是德國各級青年軍主力，惜一直未獲德國國家隊徵召，終決定選擇代表加納，佢一直對此耿耿於懷，今屆賽前更詛咒德國隊唔會走得好遠，令佢成為德國隊同球迷嘅公敵。
21年內打過兩場德國贏晒！

德國同加納近年只對碰過兩次咁大把，最近一次在上屆世界盃分組賽相遇，結果德國小勝1比0，兩隊亦於小組分列首次名晉級16強，至於再對上一次交手已經係21年前，當時德國大炒6比1。
雷斯借助門線技術第1人

國籍：巴西　

年齡：39

曾執法大賽：2013世青盃及世冠盃

簡介：今場係巴西球證雷斯本屆第2次執法，早前佢負責主吹E組法國對洪都拉斯，佢喺比賽入面一共出示咗7面黃牌、1面紅牌及判咗1個12碼，包括喺上半場後半段嘅15分鐘之內，以兩黃一紅將洪都拉斯中場柏拉西奧斯驅逐離場，同時判咗一個12碼畀法國先開紀錄。此外，下半場3分鐘，雷斯更借助今屆首設嘅門線技術，判定洪都拉斯門將華拉達利斯嘅烏龍波為入球，賽後慘被洪軍主帥路爾斯費蘭度炮轟。

執法場數：39

黃牌數：179

紅牌數：18

判12碼：12

平均黃牌：4.58

平均紅牌數：0.46

平均判12碼次數：0.3
蘇斯黑柴推介：德國讓球主勝