比軍攻俄 吼大好過

猪拉多纳

高柏尼缺陣 防線即散

H組內兩支世界排名最高球隊比利時同俄羅斯於次輪硬碰，比利時今仗開波前傳來壞消息，隊長高柏尼因傷缺陣，對布防有一定影響，不過球隊中前場夠霸氣，上仗後備入波嘅費蘭尼會正選上陣，加埋盧卡古衝擊力十足，配合夏薩特造波，唔難衝擊俄羅斯防線。至於俄羅斯亦唔會坐以待斃，上場門將艾堅菲夫牛油手先失波，球隊都冇洩氣力追，鬥志不容懷疑，今場兩軍都會去盡，一於博大。

（TVB13及19、now818及840周一凌晨零時直播）

回顧番兩軍首仗表現，都係先落後一粒，其後力追有分落袋，比利時憑兩個後備梅頓斯及費蘭尼，頭頂腳踢入兩粒反勝阿爾及利亞，而俄羅斯雖有艾堅菲夫牛油手先失波，球隊亦能靠住後備入替嘅基沙哥夫扳平，取得一分。從呢兩仗賽果及比賽過程，反映兩支青春班球隊明顯未入晒局，但球隊中前場擁有極良好嘅板櫈深度及鬥志，呢點對爭取成績好重要。
雙方前線火力十足

事實上，兩軍中前場不乏具威脅力嘅數胡人物，比利時上仗入波嘅費蘭尼，今仗將會正選上陣，配合「新魔獸」盧卡古，兩個力量型球員一個有頭槌，一個具爆炸力，有力撞冧任何防線，再加上創造力十足嘅夏薩特，剛柔並重，而且盧卡古四年前於熱身賽，仲曾經兩度攻破俄軍大門，今場信心十足再次士哥。

俄羅斯大軍則由國內幾間大球會嘅球員組成，中前場組合都有晒默契，卡比路今仗會起用基沙哥夫、沙托夫同法祖林，呢三名辛尼特球員喺球會經常眉來眼去，合埋眼都知對方喺邊個位，領隊卡比路就係想利用佢哋默契，衝擊比利時後防。
盧卡古專破俄羅斯大門

賽前傳出比利時隊長高柏尼因傷缺陣，上仗踢左閘嘅維頓漢好大可能移入中路，又或者搵華美倫頂替，不過首仗輸十二碼畀阿爾及利亞，就係因為維頓漢速度唔夠人快而扯低對方，今仗用維頓漢定華美倫，遇着比阿爾及利亞更機動化嘅俄羅斯，後防未必頂得住，加上兩軍駁火，開大機會高。至於特別項目亦有心水，正如上面所講，盧卡古曾兩度射破俄羅斯大門，特別項目先發事件「入球」有2.9倍玩得過。
MARK實佢：俄羅斯中場 法祖林

踢法瞻前顧後，於俄軍陣中具串連作用，而且氣力不盡，全場奔跑，上仗對南韓係全場跑動距離最多球員，遠射具腳頭。
MARK實佢：比利時中場 夏薩特

呢名車路士球員踢法靈活多變，速度與盤扭技術俱佳，踢法傾向似翼鋒，可憑一己之力撕破對方後防，自己有數胡能力，同時亦可以擔任助攻角色。
蘇聯解體後俄軍未贏過比軍

比利時對上一次亮相決賽周於2002年，當年佢哋亦與俄羅斯同組，最終比利時以3比2擊敗俄羅斯，成功力壓對手出線16強，可惜在16強被該屆冠軍巴西淘汰。連同前蘇聯年代，兩軍合共交手8次，比利時取得3勝1和4負稍處下風，不過自從蘇聯解體之後，俄羅斯在國際賽從未贏過比利時，心理上應以比利時稍為佔優。
今屆首紅出自佢手

佩治　Felix Brych

國籍：德國　

年齡：38

曾執法大賽：德甲、歐聯、歐霸盃

今屆決賽周首面紅牌來自今場執法球證佩治，呢位德國判官喺死亡D組首輪賽事烏拉圭對哥斯達黎加，將喺補時階段蓄意踢人嘅烏拉圭後衞彭利拿直接趕出場，另外佢喺比賽中亦出示咗3面黃牌及判罰1個12碼，以今屆尺度嚟計算幾嚴。

執法場數：74

黃牌數：255

紅牌數：18

判12碼：25

平均黃牌：3.45

平均紅牌數：0.24

平均判12碼次數：0.33
渡邊年推介：入球大