荷蘭難讓弗爆智利

猪拉多纳

尹佩斯停賽 洛賓單手拍唔響

B組最後一輪分組賽大激鬥，荷蘭喺聖保羅哥連泰斯球場硬撼智利。雖然雙方已肯定晉級，但由於此組嘅次名於16強好大機會遇上東道主巴西，為咗避開「森巴兵團」必搏甩髀，不過荷蘭有「尹超人」尹佩斯停賽及後防主力馬田斯恩迪受傷缺陣，攻守大削下讓唔起智利，梗係捧智利讓球客勝。

（TVB 01及19、now 801及841周二凌晨零時直播）

荷蘭、智利頭兩輪分組賽全取6分，雙雙出線16強，今場勝負決定首、次名誰屬。呢場比賽安排喺A組最後一輪分組賽前舉行，所以比賽嘅時候仲未知道A組最終排名，但估計巴西最後一仗可以擊敗頭兩仗全敗兼未入一球嘅喀麥隆取得A組首名，荷蘭、智利邊隊次名出線就要硬撼巴西，點計都冇着數，今場雙方未必會就住踢。
智利全場壓迫搵到食

荷蘭現時得失球差較好，打和都可首名出線，不過隊長尹佩斯喺頭兩場分組賽攞咗黃牌，累積夠數要停賽，被迫起用狀態平平嘅亨特拉爾，效率梗係唔及尹佩斯。荷蘭今屆進攻主要靠尹佩斯及洛賓發動，冇咗今屆入咗三球嘅「尹超人」攻力大減，而中堅馬田斯恩迪上仗對澳洲被撞至腦震盪，至少休息一星期，今場亦唔使預佢，對防守影響極大，甚至傳出主帥尹戈爾想收起有黃牌在身嘅迪維積及約拿芬迪根斯文，就算想搏都有心無力。

智利頭兩場表現不比荷蘭遜色，上場淨勝西班牙證明攻守兼備，佢哋全場壓迫戰術經常令對手冇啖好食，維達爾做完手術後火速重拾佳態，和阿歷斯山齊士（A山）、伊度亞度華加斯組成嘅進攻鐵三角極具侵略性，加上南美洲背景可以話有半個主場之利，有得受讓梗係捧讓球客勝喇。
A山先發入波有計

至於特別項目方面，A山弗到漏油，可趁住荷蘭唔齊腳下搵到着數，其先發事件「入球」有2.65倍諗得過。
MARK實佢：荷蘭翼鋒 洛賓

今仗隊長尹佩斯缺陣，加上代替佢嘅亨特拉爾狀態麻麻，荷蘭於進攻方面必定倚賴洛賓，呢位拜仁翼鋒係「橙軍」提高反擊速度嘅利器，而佢今屆已攻入三粒，絕對係危險人物。
MARK實佢：智利前鋒 伊度亞度華加斯

上仗智利勇挫西班牙，賽事最佳球員並非維達爾或阿歷斯山齊士等球星，而係伊度亞度華加斯，呢位前鋒唔單止速度飛快，技術細膩，仲可兼任翼鋒，不容小覷。
1928年奧運打和橙軍靠抽籤奪金

兩軍以往只曾對碰過1次，仲要係86年前嘅事，當時荷蘭喺1928年阿姆斯特丹奧運男子足球決賽同智利打和2比2，最尾主場嘅荷蘭喺抽籤抽中成為冠軍。荷蘭曾試過3次打入世盃決賽，最近一次正係上屆南非世盃，可惜全部飲恨而回，「無冕之王」名不虛傳。而智利則喺上屆世盃16強不敵巴西出局。
加斯沙馬岡比亞史上最佳

國籍：岡比亞　

年齡：37

曾執法大賽：2012奧運、非國盃(2012、2013)、2013世青盃、2013世冠盃

簡介：加斯沙馬係非洲新一代人氣球證，被視為岡比亞史上最佳球證，以體能充沛見稱，而且夠果斷，還不時面帶笑容，同球員溝通做得好好。現時每逢非洲大型賽事一定見到佢嘅身影，今場「荷智大戰」將會係加斯沙馬嘅世界盃「處子戰」。

執法場數：54

黃牌數：150

紅牌數：6

判12碼：7

平均黃牌：2.78

平均紅牌數：0.11

平均判12碼次數：0.13
法達斯維推介：智利讓球客勝