波斯尼亞無辜屈死

猪拉多纳

越位判斷都要靠高科技協助

人誰無過！聖人都會有錯！好多時當足球比賽高速進行時，球證嘅判決喺電光火石之間發生一啲人為錯誤，大部分人都盡可能喺人性化角度去理解球證執法時候所遇到嘅困難，但係依家科技先進，球證可以喺高科技器材協助下判斷或者糾正錯誤，所以外界對球證判決出錯嘅包容程度愈嚟愈低，尤其係當球證出錯而影響最終賽果。

世界盃決賽周新丁波斯尼亞成為越位誤判嘅最新受害者，迪斯高對尼日利亞嘅入波百分之一百冇越位，但係球證同旁證毫不猶豫判詐胡，對波斯尼亞所造成嘅傷害性，遠遠超越墨西哥對喀麥隆嗰兩個越位詐胡入波，至少墨西哥最後都贏到，而波斯尼亞連輸兩場可以執定包袱走人。
「悲情國家」悲情出局

獨立之後嘅波斯尼亞幾經辛苦先至爭取到亮相世界盃決賽周資格，國家受內戰影響，民不聊生， 千辛萬苦籌集資金嚟踢世界盃，甚至乎因為冇錢買多套波衫，吩咐球員唔好交換波衫，球隊上上下下都有至高無尚嘅使命感，希望通過今次比賽洗滌內戰後遺症所帶嚟嘅悲傷，同埋希望晉級16強贏多啲獎金買藥物捐贈畀受內戰影響嘅難民。但係波斯尼亞人民嘅希望，就係因為球證嘅誤判而徹底破滅！

經過長年累月嘅激烈討論，今屆世界盃儘管引入門線技術，但係仍然無辦法杜絕誤判同漏判，之前有西村雄一誤判送巴西一個十二碼，都仲可以話係球證觀點與角度問題，之不過越位就正如門線技術一樣，絕對可以即時通過高科技器材協助判斷，唔存在討價還價嘅空間！