荷蘭周身刀 張張利！

猪拉多纳

名次之爭出齊架生

荷蘭同智利雖然已經喺B組出線，但都仲要精銳盡出爭首名，避開好可能係A組1哥嘅巴西。論實力，荷蘭同智利係不相伯仲，不過論戰術同板櫈深度，「橙軍」就似乎稍勝一籌喇，呢場波足智彩開平手盤，梗係撐1.92倍嘅荷蘭啦！

（TVB1及now801台、中央5台周二凌晨0:00直播）

荷蘭首戰怒炒西班牙5:1技驚四座，但次輪對澳洲嘅表現就略為失色，射手尹佩斯仲食埋第2張黃牌，今場停賽唔出得，搞到「橙衣軍團」教頭尹戈爾焗住變陣。
小組、兩翼、遠射入波瓣數多

不過咁，今場好有可能做「替工」嘅亨特拉爾，射術雖然唔可以同尹佩斯相提並論，但都總算係有一定級數嘅前鋒。最重要嘅，係亨特拉爾夠晒高大，對住智利身形矮小嘅守將，應該會佔到一定甜頭。

我之所以話荷蘭戰術犀利，原因係佢哋嘅入波招數勁多，主攻嗰陣可以玩猜波小組入楔，即使搓唔到入禁區，又可以靠史奈達同尼祖迪莊玩遠射，甚至乎用兩翼出波「空襲」都得；打反擊又有洛賓呢隻超級快翼，堅令對手防不勝防。

係，智利上仗清脆踢「狂牛」出局，壓逼性踢法的確係贏盡掌聲，不過大家要考慮一點，就係西班牙嗰場波係咁「歎慢板」，慢到令人恰眼瞓，智利先可以控制到比賽節奏，今戰對手換上以速度見稱嘅荷蘭，好可能就會見底。
智利中場兩大將未必披甲

再講，智利條防線由始至終都未受過威脅，對住澳洲同西班牙當然夠做啦，但面對荷蘭呢啲咁猛火嘅球隊，我就有啲保留囉。最大鑊係佢哋件中場核心維達爾有傷在身，另一件「好波之人」艾蘭古斯亦有啲唔妥，而且佢兩個家陣都孭住張黃牌，再賴嘢就要喺16強坐波監，領隊森柏奧利極有可能會順勢收起佢哋，實力大打折扣，平手盤捧荷蘭，坐走望贏啦！
Data King : 荷蘭上仗靠側擊

‧荷蘭近10場比賽取得6勝3和1負。

‧上場對澳洲15射14中，射門命中率超過9成。

‧進攻模式多，上仗對澳洲玩側擊，有81%攻勢都係喺兩邊出波。

‧踢過44場世盃決賽周比賽，取得24勝10和10負，攻入79球，失47球。
Data King：智利近10戰7勝

‧智利上場對西班牙射門7射4中，入2球，把握力強。

‧近10場比賽取得7勝1和2負。

‧對上兩場分組賽，平均傳球成功率達79%。

‧踢過33場世盃決賽周比賽，取得13勝6和14負，攻入44球，失48球。
乜都玩錦囊：高手過招博入球細

荷蘭今仗有射手尹佩斯停賽，洛賓孭重飛攻堅，不過以佢一人之力，要好似前兩仗咁隊人幾粒確係唔易，始終智利條防線都唔係善男信女嘛！呢場波入球中位數2.5球，1.92倍嘅入球細可以一試。