墨西哥守細波封殺格仔兵 2014/06/23

猪拉多纳

和波就出線 奧祖亞Show Time

睇波除咗入波好睇外，守門員飛身撲救嘅鏡頭同樣精彩，好似上場墨西哥對巴西，雖然最終冇入波，但墨西哥門將奧祖亞就有神級演出。今晚墨西哥喺A組分組賽最後一戰鬥克羅地亞，只要和波就出線，有奧祖亞把守最後一關，睇怕「格仔兵」班射手好似文迪蘇傑同奧歷等唔係咁易入波，推介1.68倍入球細！

（TVB1、now801周二凌晨4:00直播）

世事無常，今日唔知聽日事！有邊個會諗到奧祖亞以前踢過前鋒，之後又涉嫌服用違禁藥，被球隊炒魷魚，做埋失業大軍……幾乎最衰嘅事都發生晒喺佢身上。不過經過上場對巴西一役，奧祖亞簡直係一戰成名，佢全場波最少救咗5球必入波，上半場救尼馬嘅頭槌，更加係神救中嘅神救！
巴西球迷惡搞：同避孕套咁穩陣

依家唔止畀巴西球迷惡搞奧祖亞，將佢個樣印喺避孕套嘅包裝上面，寫住「同奧祖亞一樣咁穩陣」，係咩意思大家明啦！仲傳緊巴塞隆拿、利物浦同阿仙奴等豪門勁旅，都想打佢主意。佢今年只係28歲，正值黃金期，相信經過今屆世盃後，必定大把世界，為爭取更好條件嘅合約，今場對住克羅地亞，當然希望再保清白之身啦！
克羅地亞大勝未必有料到

至於上場大炒喀麥隆「4蛋」嘅克羅地亞，入球能力好似好高咁，但諗深一層，喀麥隆本身已經唔夠班，班球員又嫌獎金少無心戀戰，畀人大炒一啲都唔奇。「格仔兵」今場遇上表現唔曳兼實力接近嘅墨西哥，睇怕無咁易踢，邊隊贏就好難講，但相信唔會大手交易，博入球細啦！
Data King：84%攻勢靠兩翼側擊

‧克羅地亞近10戰取得5勝2和3負。

‧兩仗平均成功傳球率達74%。

‧進攻模式主要係兩翼側擊，上場對喀麥隆共有84%攻勢由兩邊發動。

‧98年﹑02年同06年3屆世盃分組賽，第3場比賽成績為1和2負。
Data King：近戰勁旺半場細

‧近10場比賽，取得5勝3和2負。

‧墨西哥歷來只曾3次同克羅地亞交手，成績為1勝2負。

‧近8場比賽，開咗7場半場細。

‧連續5屆世盃打入16強後止步。
乜都玩錦囊：乜都玩錦囊

克羅地亞上場贏波重燃出線希望，今場梗係想搞掂墨西哥取得出線權。不過墨軍門將奧祖亞咁Fit，而且和波都出線，好有可能踢「擦鞋仔波」死守「格仔兵團」，墨西哥受讓平半，1.76倍嘅下盤抵玩。