唔走線唔留力 巴西變陣開火趕喀

猪拉多纳

大菲唔Like費特 祖奧正選孭飛

話都冇咁快，最後一輪世盃分組賽今晚展開，東道主巴西喺A組迎戰喀麥隆。可能好多人會諗，究竟「森巴兵團」會唔會睇定嚟食玩走線，但睇見領隊史高拉利鬼殺咁嘈話要變陣加強火力，又冇乜意欲收起尼馬洗底，似乎係想炒起篤定出局嘅喀麥隆攞彩，就算讓到「-2」，1.75倍「讓主」都捧得過。

（TVB13及now818台、中央5台周二凌晨4:00直播）

由於荷蘭對智利嘅B組榜首大戰今晚早過A組踢，所以巴西會唔會睇定嚟食揀16強對手，係賽前嘅焦點話題。門將施薩索拉斯前晚向記者話，「森巴兵團」唔會赦任何對手，今仗鬥喀麥隆必定全力爭勝。本來亨格比利就覺得呢番說話好行，但睇埋大軍賽前喺高馬利農場嘅操練報告，就Feel到森巴兵唔係口旱旱。
尼馬 堤亞高施華有牌在身照踢正選

史高拉利尋日進行分隊對抗賽，正選陣容嗰邊唔單止有克服大腿肌肉傷嘅侯克，仲有尼馬同堤亞高施華等主將，要知道「新比利」同隊長堤亞高施華都孭緊簿，今仗再拎黃牌嘅話，16強就要停賽，睇嚟「大菲」今晚冇意欲幫佢兩個洗底喎！仲有，巴媒話史高拉利對前鋒費特好不滿，話佢上仗鬥墨西哥嘅跑動範圍好少，今晚極可能會搵祖奧擔正，咁有要求，似乎「大菲」堅係想搵喀麥隆祭旗贏鋪勁喎。
「內訌」喀麥隆 伊度奧繼續抖

歷來4次同巴西交手錄1勝3負嘅喀麥隆，頭兩場分組賽輸晒後篤定出局，最大鑊係防守中場桑治要停賽，上仗慘敗畀克羅地亞0:4場波，左閘伊高圖仲玩內訌，頭撼隊友莫簡祖添。至攞命係全隊最好波嗰件伊度奧，亦因右膝受傷好大機會繼續缺陣，咁搞法點夠巴西鍊呀？事實上，巴西上仗鬥墨西哥，如果唔係對手門將奧祖亞上身，「墨仔」晨早輸鑊甘，喀麥隆對住「格仔兵」都要吞4蛋，點頂火力更強嘅巴西吖！
Data King：4次交手全開半細

‧巴西近10場比賽，取得9勝1和不敗成績。

‧歷來4次對喀麥隆，皆開半場細。

‧巴西上仗前鋒尼馬同奧斯卡加埋共有7次攻門，佔全隊14次嘅一半。

‧踢過99場世盃決賽周比賽，取得68勝16和15負，攻入213球，失89球。
Data King：傳波成功率僅7成

‧喀麥隆近10仗，取得4勝2和4敗。

‧歷來4次對巴西得1勝3負。

‧踢過22場世盃決賽周比賽，取得4勝7和11負，攻入17球，失39球。

‧對上2場分組賽中，平均傳波成功率只有72%。
乜都玩錦囊：喀麥隆鬥攻玩大佢

喀麥隆篤定出局，冇心理包袱自然踢得夠放，領隊禾卡賽前話想藉今仗重新提升國家隊形象，咁講法似乎想同巴西鬥攻喎，唔識死隨時輸得更大鑊，中位數3.5球照捧1.92倍大。