哥倫比亞飢渴冇留手

猪拉多纳

日本內訌士氣跌谷底

瀕臨出局嘅亞洲勁旅日本，今晚將會喺庫亞巴舉行嘅世盃C組尾輪火併哥倫比亞。不過「東瀛武士」狀態唔弗之餘，球員、高層不斷傳出不和消息，生死戰前搞內訌乃兵家大忌，相反哥倫比亞愈戰愈勇，核心「007」占士洛迪古斯弗到漏油，主帥柏加文仲叫球員要保持冷靜，唔好輕敵，此消彼長之下，哥軍小讓平半值得捧場。

（TVB 13、now 818及840周三凌晨4時直播）

日本在世盃揭幕前揚言要殺入8強，不過佢哋踢兩場分組賽只得一和一負，表現唔多對辦喎，最重要係「東瀛武士」一向團結嘅精神蕩然無存，先有傳「國寶」本田圭佑集訓期間掛住溝女，而主帥沙哲朗尼喺戰術調整方面，大多取決於本田嘅意向，引來隊友不滿，嚴重影響內部士氣。

不但如此，該隊日前突然取消操練，沙帥解釋話想畀球員多啲時間「調整自己嘅精神」狀態，講到明同體能無關，但日本足協技術委員長原博實就話因為訓練基地氣候高溫潮濕，令球員難以適應，最後決定取消操練，同沙帥口供唔夾，似係內訌居多，依家上至高層、下至球員都立立亂，你話唔會影響比賽表現？邊有人信呀！
博「007」占士仔入波

最弊係日本要出線，除咗要自己爭氣贏波（累積4分）之外，一係望科特迪瓦輸畀希臘，跟同分嘅希臘計得失球差，一係望科特迪瓦和波，再與同分嘅科軍計得失球差，總之變數好多唔多樂觀。相反，哥倫比亞事隔16年再踏世盃舞台，眾將對世盃嘅飢渴感成為前進動力，「007」占士洛迪古斯不但擅於組織進攻，連後上埋門都大有進步，連續兩仗有士哥兼被選為最佳球員，為球隊鎖定出線資格，令人忘記因傷退隊嘅「老虎」法卡奧。

主帥柏加文經驗老到，佢賽前奉勸球員要保持冷靜，切忌因連贏兩場而沖昏頭腦，面對問題多多嘅日本可睇高半線，今仗哥軍小讓平半，上盤咪錯過。特別項目方面，由於占士洛迪古斯實在太弗，寧買當頭起，特別項目先發事件捧有3.3倍嘅「入球」。
MARK實佢：哥倫比亞後衞 耶比斯

年屆38歲嘅耶比斯係今屆世盃年齡第二大嘅參賽球員，佢為咗踢世盃等咗15年，因此甚有飢渴感，尤其喺「老虎」法卡奧因傷退隊下，呢位老將嘅經驗對呢支年輕球隊非常重要，上仗擊敗科特迪瓦完成10次攔截兼冇犯規，係哥軍防線定海神針。
MARK實佢：日本中場 本田圭佑

呢位cool到爆國寶級人物，雖有傳因為主帥沙哲朗尼偏心於佢而遭隊友孤立，但本田圭佑無疑係陣中進攻靈魂，盤傳射皆精，後上入楔令人防不勝防，難怪上仗對希臘被選為最佳球員，日本能否死裏逃生就靠晒佢喇。
趕走桑治威水球證

普恩卡 Pedro Proenca

國籍：葡萄牙　

年齡：43

曾執法大賽：歐聯、歐霸盃、10世界盃、12歐國盃

簡介：今仗係普恩卡第二次執法世界盃賽事，佢首場執法嘅賽事為A組喀麥隆對克羅地亞，仲喺上半場就將無端端開（月爭）打克羅地亞前鋒文迪蘇傑嘅喀麥隆中場桑治紅牌趕出場。正職係財務顧問嘅普恩卡，被譽為葡萄牙史上最傑出球證，最威水係喺2012年主吹歐聯及歐國盃決賽，並當選該年度國際足球歷史及數據統計協會最佳球證。

執法場數：90

黃牌數：342

紅牌數：15

判12碼：20

平均黃牌：3.80

平均紅牌數：0.17

平均判12碼次數：0.22
C組出線條件：科特迪瓦出線

‧科特迪瓦勝

‧科特迪瓦和、日本勝（科、日計算得失球差）

‧科特迪瓦和、日本和或負
日本出線

‧日本勝、科特迪瓦負（日、希計算得失球差）

‧日本勝、科特迪瓦和（日、科計算得失球差）
希臘出線

‧希臘勝、日本和或負

‧希臘勝、日本勝（希、日計算得失球差）
法達斯維推介：哥倫比亞上盤