《球迷奇遇記》夠經典

猪拉多纳

「起來，起來，起來，起來，今晚大家不想去街，起來，起來，起來，起來，坐低又起身搏命嗌」每逢四年一度嘅世界盃開鑼，我都會諗起李克勤呢首98年世盃主題曲《球迷奇遇記》，唔單止係因為首歌嘅旋律易記、歌詞得意易上口、電視台日播夜播，更係因為我第一次睇波就係98世盃決賽法國對巴西，嗰陣十歲都唔夠嘅我唔知點解會夜麻麻起身同老竇一齊睇波，傻更更睇住一位地中海叔叔（施丹，恕我嗰陣咁無知）射死巴西，依家諗起都幾好笑。

人愈大，就愈知道《球迷奇遇記》呢首歌講中晒球迷要三更半夜起身睇波嘅心情，亦明白世盃呢項大賽點解能夠令咁多人陷入瘋狂狀態。雖然之後其他歌星都有唱世盃主題曲，但喺我心目中最經典嘅仍然係呢首《球迷奇遇記》。

同樣人愈大愈覺得以前好多嘢都比依家好得多：以前陳奕迅、容祖兒、楊千嬅嘅歌總係好聽啲；張衞健嘅《西遊記》絕對比依家播緊嗰套好睇一百倍。

時代變，心境也變，不過唯一不變嘅可能係對足球嘅熱情，仍然覺得世盃繼續咁精彩，仍然深愛着利物浦。