藍衫軍夠淡定烏拉圭搶韁牙煙

猪拉多纳

意大利今晚同烏拉圭合演D組出線生死戰，家陣兩軍同得3分，但意大利得失球差係零，而烏拉圭係-1，即係話烏拉圭想出線，就一定要喪攻搶W，壓力都咪話唔細。相反，「藍衫軍」可以踢番最耍家嘅穩守突擊，而且呢班波係典型大賽球隊，心理質素好到冇朋友，足智彩開平手盤，梗係捧1.92倍嘅意大利啦！

（TVB1及now801台、中央5台周三凌晨0:00直播）
烏拉圭非勝不可冇料焗攻靠唔住

唔係認叻，早喺世盃開戰前，我已經睇死英格蘭會喺分組賽出局，所以佢哋接連輸畀意大利同烏拉圭，可以話係我意料之內，但有一樣嘢我估唔到嘅，就係烏拉圭竟然贏得咁辛苦！呢支南美「掛名」勁旅，首戰夠膽死畀哥斯達黎加炒3:1，咁都算喇，到第2戰鬥英格蘭，諗住烏拉圭有「蘇神」復出，可以見真章喇啩，點知成場波「烏圭」都畀人狂砌，最終只得嗰兩成幾控球率，佢哋之所以開到W，完全係蘇亞雷斯一個人嘅功勞，班隊友質素勁參差，根本幫唔到手。

況且，大家都見過烏拉圭焗攻嘅情況係點啦，咪就係好似首戰咁攻就無力，後面失多粒囉！偏偏喺呢啲咁危急嘅關頭，佢哋位隊長盧根奴仲養緊傷，今戰繼續由後備守將彭利拿頂上，呢啲咪叫屋漏兼逢連夜雨囉！
迪羅斯大腿傷莫達頂上

係，對家意大利都係陣容不整，防中迪羅斯觸傷大腿舊患肯定缺陣，要由莫達補上，好彩另一守將迪施基利奧已經好番，練波嗰陣仲鬼咁生猛！點都好，就算「藍衫軍」殘陣出戰亦一樣唔使驚，事關呢班波大賽經驗豐富，而且心理質素極高，我都係球員，可以話畀大家知嚟到呢啲生死戰場合，心理質素同經驗先係致勝關鍵，大家仲記唔記得2年前歐國盃？當時意大利同英格蘭互射12碼，首輪「藍衫軍」射失，派路喺非入不可之下，竟然仲夠薑整個瀟灑Chip射，結果意大利咪就係憑呢球波逆轉對手囉！

除咗心理質素，意大利頭兩輪分組賽嘅表現，亦比烏拉圭好，佢哋雖然都係輸畀哥斯達黎加，但至少壓住對手嚟攻，首戰鬥英格蘭，亦完全係技術性KO「三獅兵」，無論計經驗、表現定心理質素，「藍衫軍」都係贏晒，平手盤冇理由唔捧意大利呀？
Data King：傳球成功率達87%

‧意大利近2場平均傳球成功率達87%。

‧近10場賽事取得2勝6和2負。

‧歷來8次對烏拉圭，只得取得2勝4和2負。

‧近3屆第3場分組賽成績為1勝1和1負。
Data King：8次交手全開半細

‧烏拉圭上仗有10次射門，前鋒蘇亞雷斯獨佔6次。

‧近10場取得6勝2和2負。

‧歷來8次對意大利，8場皆開半場細。

‧烏拉圭喺90年、02年同埋10年3屆第3場分組賽成績為2勝1和。
乜都玩錦囊：烏拉圭搶攻博半客

烏拉圭要贏先出到線，隨時一開波就主動搶攻，意大利一向比較慢熱，一個唔留神或被對手先開紀錄，可以博一博3.2倍嘅「半場客勝」。