哥倫比亞食住強勢過3關

猪拉多纳

日本焗攻仲捉蟲

今屆世盃好多場分組賽嘅賽果都令人好意外，依家英格蘭同西班牙都出咗局，日本隊亦大有機會步英、西後塵，提早返屋企。「藍武士」喺頭兩戰對科特迪瓦同希臘都贏唔到，今戰對住同組實力最強嘅哥倫比亞，要開W先有機會出線，鋒力疲弱仲要焗攻咁唔自量，隨時輸鑊甘，寧願博哥倫比亞3戰全勝好過喇，哥國小讓平半，捧1.94倍上盤。

（TVB13及now818台、中央5台周三凌晨4:00直播）

雖然日本喺香港勁多Fans，但佢哋喺今屆世盃嘅演出真係堅唔爭氣，搞到粉絲相當失望。最慘係成班波好似愈踢愈洩氣咁，首戰對科特迪瓦先開紀錄係威係勢，即使反敗都總算叫做輸都輸得好好睇睇，但上仗對住打少個嘅希臘，全場圍攻都贏唔到，前鋒大久保嘉人仲大大個空門都射唔入，真係點都講唔通。
大久保 香川仔愈踢愈沉

「藍武士」條中場線就仲大鑊，靈魂本田圭佑嘅表現尚算過得去，但香川真司就真係畀「過氣魔頭」莫耶斯雪到硬晒，完全冇貨交，唔講仲以為佢冇去到巴西添！大家都真係好難怪教頭沙哲朗尼會擺佢做後備囉！需知道日本隊一直靠機動、靠勤力走位搵着數，但呢招對住最屎嗰隊希臘都冇作用，今場對住比佢哋更機動、更搏命嘅哥倫比亞，又點會有運行呀？
哥倫比亞洛迪古斯請纓搏殺

最重要一點，係哥倫比亞表現極具霸氣，2戰全勝攞晒6分，錄得國家隊史上嘅最佳決賽周成績，家陣個勢咁好，雖然呢場波佢哋執1分都可以首名出線，但係中場大將占士洛迪古斯都話唔想窒咗道氣，會繼續搏殺，務求過晒3關攞足9分，以最強聲勢殺入16強。

因傷冇份入選嘅法卡奧，賽前都喊晒口話多謝隊友幫佢完成夢想，小妹都希望呢班波愈戰愈勇，可以喺今屆世盃走得更遠。今場波捧上盤之餘，夠狠嘅話直取哥倫比亞W都仲得！
Data King：日本對賽旺開細

‧日本近10場波取得5勝2和3負。

‧日本曾經對過哥倫比亞2次，2場都開入球細。

‧近3屆決賽周，第3場分組賽成績為2勝1負。

‧近2場世盃分組賽成功傳球率為80%。
Data King：哥倫比亞半場不敗

‧哥倫比亞近10場波取得5勝4和1負。

‧近3屆決賽周，第3場分組賽成績為1勝1和1負。

‧近8場波半場未輸過，取得2勝6和。
乜都玩錦囊：哥 日冇火細玩得過

哥倫比亞今場只要唔輸，就可以首名出線，未必會好似對上兩場咁砌到盡，分分鐘贏1粒就收手。對家日本入球能力不足備受批評，既然兩軍都冇乜火，1.85倍嘅入球細當然玩得過啦！