大象國爭出線踩扁希臘

猪拉多纳

總統落柯打獎金加倍

科特迪瓦今晚喺C組對希臘要出線嘅話，和波唔夠穩陣，贏波先係上策，所以總統瓦塔拉仲下令呢場贏波獎金會加倍！佢哋對手希臘火力唔多掂，上場靠運摸和日本，但今場遇着「大象兵團」，又有中場核心加素蘭尼斯停賽，未必可以咁好彩。科特迪瓦讓平半，1.72倍嘅上盤抵玩！

（TVB1及now801台周三凌晨4:00直播）

「大象兵團」上場不敵哥倫比亞後兩戰得3分，今場和波嘅話，出唔出到線就要睇同晚日本對哥倫比亞賽果，所以都係贏波最實際。科特迪瓦國民議會議長索羅日前去訓練基地探班，仲爆料話總統瓦塔拉已經落咗「柯打」今場國家隊贏波嘅話，獎金加足一倍，由原先每人1.8萬歐元加至3.6萬歐元（約38萬港元），但相信一班球員都會踢得更加落力，務求獎金「袋袋平安」！
托尼兄弟為離世細佬而戰

雖然中堅索高拿今場要坐波監，但代替嘅高路托尼經驗老到，絕對穩陣。佢同耶耶托尼最近收到細佬伊巴謙托尼，不敵癌魔去世嘅慘痛噩耗，難得佢兩個咁堅強，留喺巴西同國家隊共同進退。兩兄弟今晚拍住上，除咗要協助國家隊贏波取得出線資格之外，仲要為細佬而戰，一定會搏到盡！耶耶托尼首戰表現麻麻，但上場對住哥倫比亞入晒局，相信嚟緊希臘要阻止佢策劃攻勢都幾難。

儘管大象躉不斷呼籲領隊林武治，唔好用韋菲特邦尼打箭頭，出番「魔獸」杜奧巴，之不過林武治日前講到明，自己已經厭倦杜奧巴打正選或後備嘅爭議，「魔獸」做後備殺手亦唔係第一日嘅事，相信林帥今仗會繼續先用韋菲特邦尼攻堅。
希臘傳雲尼亞里接任

另邊廂嘅希臘出線雖然仲未絕望，但中場老將加素蘭尼斯上場做咗「紅牌阿姑」，今場唔出得，進一步減弱中場實力。依家仲要傳出意大利籍領隊雲尼亞里喺世盃後取代費蘭度山度士，成為希臘下任領隊，最後一場先嚟傳出呢啲消息，軍心點都會受到影響。希臘今屆攻不銳守不穩，今晚輸少球已經偷笑，所以呢個上盤抵撐！
Data King：連開7口半場細

‧希臘近10場比賽取得4勝4和2負。

‧連開7口半場細。

‧近2場分組賽合共錄得21次射門，中框12次，但就無入波，把握力極曳。

‧曾先後2次打入決賽周分組賽，1994同2010年嘅第3場分組賽全敗，兼0入球。
Data King：歷來小組第3場全勝

‧科特迪瓦10場取得4勝3和3負。

‧近2場傳球成功率為79%，有力控制中場。

‧近8場比賽開6場大。

‧曾先後2次打入決賽周分組賽，2006年及2010年嘅第3場分組賽事全勝。
乜都玩錦囊：兩隊火力弱冇攻細

希臘首兩場都冇波入，可想而知火力有幾曳。佢哋對手科特迪瓦次輪對住實力差唔多嘅哥倫比亞，要千辛萬苦先入到一球，足證火力同樣有待改善。今場入球大細中位數2.5球，可以試吓1.72倍嘅入球細。