阿根廷再射超霸鷹

猪拉多纳

博27歲美斯入波賀壽

世盃F組最後一輪分組賽，只要和波就可以出線嘅尼日利亞喺阿萊格里港河岸球場面對2連勝已率先晉級16強嘅阿根廷。「潘帕斯雄鷹」近兩仗表現雖然麻麻，但球隊級數始終高於「超霸鷹」，加上美斯剛度過其27歲生日，「壽星仔」自然希望以贏波「慶生」。而且阿根廷近3次喺世盃分組賽對尼日利亞都獲勝，有啲「格食格」嘅味道，今仗一於捧「潘帕斯雄鷹」奏凱，以全勝姿態晉級16強。

（TVB13、now 818及840周四凌晨零時直播）

阿根廷分組賽首兩仗雖贏波，但表現其實麻麻，除咗美斯成功打破世盃入球荒及一直扮演救世主嘅角色外，「潘帕斯雄鷹」嘅整體發揮仍有好多未盡如人意嘅地方，令阿根廷球迷睇得唔過癮又唔滿意。阿根廷攻守其實比較平均，但上仗面對以鐵桶陣方式應戰嘅伊朗就顯得束手無策，今仗對手尼日利亞只要一分就能出線，相信都會擺出同樣嘅防守陣式應付「潘帕斯雄鷹」。
尼日利亞不擅死守

不過，尼日利亞向來唔係一支擅於防守嘅球隊，今次大軍前線可以話係人才濟濟，無論域陀摩西斯、奧丹維治定係艾美奧比，都係獨當一面嘅悍將。相反，「超霸鷹」嘅防線就比較薄弱，只有老將尤保和艾捷亞積利効力歐洲頂級聯賽球隊，其餘球員只係踢緊二線聯賽甚至喺尼日利亞本土搵食，球員質素始終難與前線相提並論。再加上阿根廷主帥沙貝拉經過首兩仗後，相信已為球隊搵到破密集嘅方法，「潘帕斯雄鷹」今仗絕對有能力擊敗「超霸鷹」。

此外，阿根廷與尼日利亞過去曾3次喺世盃分組賽碰頭，3次都係「潘帕斯雄鷹」贏波，似乎有點食住「超霸鷹」嘅味道。而阿根廷主將美斯剛度過其27歲生日，屋企所有成員更嚟到巴西同佢「慶生」，擊敗尼日利亞除能令球迷滿意及增強信心踢好淘汰賽外，相信亦係呢位「壽星仔」嘅最佳生日禮物，今仗一於捧阿根廷贏波。另外「壽星仔」美斯近兩場分組賽都有波入，狀態實在弗到漏，建議捧其先發事件「入球」。
11火辣女神撐潘帕斯雄鷹

阿根廷已經穩奪16強一席位，拉丁男士雜誌《Hombre》最近就特別推出世界盃特刊，由11位火辣模特兒組成嘅阿根廷啦啦隊，為國家隊打氣！呢11位「阿根廷女神」個個都非常性感，今晚有佢哋嘅支持，班球員仲唔畀多兩錢肉緊打好啲咩？
尼軍中場：美斯只係普通人

至於尼日利亞中場奧根耶奧拿斯就信心十足，話完全唔怕阿根廷球王美斯，指對方都係普通人，只要球隊踢出賽前部署，就可以對付到佢。奧根耶奧拿斯仲話球隊表現已經有明顯進步，呢場做好自己本分就會可以，唔赦「潘帕斯雄鷹」！
美斯謙推介：阿根廷勝