勿為一棵樹放棄成個森林

猪拉多纳

世界盃期間，大家目光都集中喺巴西，其實好正路嘅，話晒四年一度盛事，不過其實足智彩同日都有三場美國波受注，包括兩場美聯盃第五圈及一場美職補賽，如果世盃場合無心水，不妨諗諗芝加哥火燄對哥倫布機員入球細。

渡邊年唔係諗住將呢個專欄轉做賭波預告稿求其交貨算數，只係想提提大家，唔好因為世界盃忽略咗身邊其他嘢，即係俗語所講嘅「唔好因為一棵樹放棄咗成個森林」。

通常世盃期間，梗係會有啲「女人應該點樣融入足球熱」，其實做男人嘅有冇掉轉頭諗，唔睇波陪吓身邊人呢？又例如「為睇世界盃捱更抵夜都值得」，但又有冇見到報紙寫唔少新聞話有人睇夜波捱到暴斃。世界盃今次唔睇，四年之後又有，甚至乎八月歐洲各地聯賽又開波，大把你睇啦，但如身邊人離開你，又或者健康離你而去，想返轉頭就難。

講到咁，唔係話叫大家唔好睇波喺度倒米，只係提提大家，每件事要適可而止，分組賽就嚟完，淘汰賽階段大家更加會關注，如何喺足球、伴侶、朋友、健康同工作之間取得平衡，係一個負責任嘅球迷要計劃嘅事。