阿根廷做人情 放生超霸鷹

猪拉多纳

今晚F組賽事，尼日利亞惡鬥阿根廷。「超霸鷹」首兩戰1勝1和，今晚只要能夠喺阿根廷身上搶到分，就可以殺入16強，鬥志一定比晨早穩奪出線權、今戰或保留實力嘅阿根廷高幾倍，尼日利亞受讓1球，1.88倍嘅下盤捧得過！

（TVB13及now818台、中央5台周四凌晨0:00直播）

「超霸鷹」要晉級，最簡單直接嘅方法，就係自己爭氣搶到分。若然輸波，就要睇埋同晚另一場伊朗對波斯尼亞嘅戰果。如果尼日利亞輸0:1，而伊朗以1:0擊敗出咗局嘅波斯尼亞，兩軍就會同得4分，得失球、總入球同對賽全部一樣，國際足協就要喺比賽後90分鐘，於馬拉簡拿球場進行抽籤，決定「超霸鷹」同伊朗嘅命運。既然主動權喺自己手上，尼日利亞今場梗係會打醒12分精神，學足伊朗咁，擺架「大巴」喺後場，搵機會打反擊啦！
尼日利亞2大守將傷愈搏殺

尼日利亞賽前收到好消息，就係兩大防線猛將可以復出鬥阿根廷！正選中堅奧保亞邦拿同左路猛將巴巴端迪日前已經復操，國家隊發言人話，佢兩個都已經Ready，巴巴端迪狀態更加係托弗，不過奧保亞邦拿落唔落場，就要等基舒自己去決定。
阿根廷攞1分都可以首名出線

我認為喺呢場決定國家隊命運嘅生死戰，基舒點都會叫奧保亞邦拿頂硬上，始終後備老將尤保轉身太慢，對住美斯、希古恩同阿古路呢啲高速前鋒，未必可以跟得足全場，反之奧保亞邦拿身高腳長又夠快，防守範圍極廣，絕對可以頂得住阿根廷攻勢。

阿根廷過去兩場波都係僅贏1粒，對住伊朗條防線攻極都攻唔入，要靠美斯嘅世界波先可以開到W。既然「潘帕斯雄鷹」都已經殺入16強，今戰只要攞1分仲可以篤定首名出線，今晚冇必要再喪攻，可以慢慢睇定嚟踢，既然大家各得1分就皆大歡喜，阿根廷極有可能保留實力，做個順水人情放生「超霸鷹」，尼日利亞受讓一球，下盤好穩陣。
尼日利亞旺開半場細

尼日利亞近10場波取得3勝6和1負。

同阿根廷有6次對賽，取得1勝1和4負。

喺98年、02年同06年世盃分組賽第3場嘅成績，為2和1負。

近8場比賽半場開6口和波。
阿根廷世盃喪攻王

阿根廷近10戰取得7勝2和1負。

近2場分組賽平均成功傳球率達83%，32強中列第2。

近3屆世盃第3場分組賽成績為1勝2和。

係首2場分組賽進攻次數最多嘅球隊，達129次。
尼日利亞照抄守細波

阿根廷近2場波都係僅贏1粒，雖然呢班波陣容星光熠熠，但係就雷聲大、雨點小，上場對住擺「大巴陣」嘅伊朗，更加係老鼠拉龜。今場尼日利亞和都出線，極可能照辦煮碗玩死守，入球中位數2.5球，1.95倍入球細抵博。