波斯尼亞 伊朗大團圓結局

猪拉多纳

親友探班做好戲 全力搶攻爭晉級

波斯尼亞同伊朗今晚喺F組合演尾輪分組賽，伊朗為爭出線必定搶攻爭勝，對手波斯尼亞雖篤定出局，但最後一場領軍嘅蘇錫亦希望做番齣好戲畀剛入營探班嘅鄉親父老睇，兩邊都唔慌保守，今晚實「大」團圓結局，捧1.88倍大。

（TVB1、now801台周四凌晨0:00直播）
伊朗續租營地入硬16強？

兩戰過後得1分嘅伊朗，想躋身16強就要贏波斯尼亞，再望另邊廂嘅阿根廷擊敗尼日利亞。呢支亞洲隊伍今屆世盃喺聖保羅州嘅瓜魯柳斯紮營，本來只係租用咗哥連泰斯個訓練場兩個禮拜左右，但前晚有消息話伊朗足總同哥連泰斯已經傾緊延長租用，似乎對出線16強好有信心喎！

要贏波斯尼亞，伊朗就要做頭兩輪分組賽都做唔到嘅嘢─入波！雖然佢哋今屆決賽周仲未有士哥，但鋒將索查上仗幾次反擊都搞到阿根廷後防風聲鶴唳，右翼迪查加仲幾乎博到12碼添，所以領隊奎雷斯同迪查加都話唔擔心鋒力問題。
波斯尼亞領隊告別戰

波斯尼亞連環輸畀阿根廷同尼日利亞後宣布執包袱，連日嚟都只係安排一啲輕鬆操練，不過咪以為佢哋會當今仗例行公事，伊比斯域強調全隊會盡一切努力，喺離開巴西前留個好印象畀大家。一班以迪斯高老竇為首嘅親友，前日亦專登入場探班睇波斯尼亞操練，屋企人繼續支持，班國腳梗唔想令佢哋失望啦！

據《天空體育》報道，波斯尼亞足總決定唔同領隊蘇錫續約，即係話呢位59歲教頭帶埋今仗就會離隊。查實蘇錫近日備受批評，話佢嘅戰術太保守，消息指佢今晚會派番伊比斯域搭迪斯高打雙箭頭，希望喺告別戰帶領波斯尼亞奪得國家史上首場世盃決賽周勝仗。伊朗搏命爭出線，冇包袱嘅波斯尼亞亦想省靚招牌，入波邊會少吖！
解圍成功率64%包尾

波斯尼亞近10場比賽取得5勝5負。

歷來5次對伊朗全部開大。

近2場分組賽平均傳球成功率為79%，列強中排第6位。

近2場分組賽解圍成功率只有64%，32強中最低。
歷來5次交手4勝

近10場比賽取得4勝4和2負。

歷來5次對波斯尼亞有4勝1和。

近2場分組賽平均傳球成功率只有60%，32強中排包尾。

喺78、98同06年3屆世盃第3場分組賽，取得1和2負。
信伊朗往績捧下盤

伊朗踢法機動加上鬥志好，歷來5鬥波斯尼亞更錄得4勝1和佳績，信往績嘅話，今仗受讓平半梗係要下盤啦！