和波雙贏Why Not?

猪拉多纳

奇哥勒夫夾計踢走C朗

今晚世盃G組美國對德國，全世界都估計會係一場「默契和波」，事關兩隊打和即可攜手出線，但最大關鍵係雙方主帥奇連士文同勒夫曾係德國隊最佳拍檔，關係亦師亦友，自然一團和氣，合力踢走葡萄牙。C朗除咗面對雙「德」操控戰果，葡萄牙今輪對加納仲有「豬一般的隊友」比比復出，隨時又累事，內外夾擊下今鋪真係插翼難飛。

過往大賽不時出現最後一輪分組賽，對賽球隊和波雙贏嘅局面，最經典莫過於04年歐國盃，兩支北歐球隊丹麥同瑞典踢出「世紀波膽」2比2，剛好以較多對賽入球力壓同分嘅意大利齊齊出線。美、德今仗被熱唱將會「默和」，唔止係建基一般利益輸送，更係奇連士文同勒夫之間感情互信。
交情深厚 老友有偈傾

兩人球員時代初期都効力過史特加，奇連士文平步青雲，成為世界級射手，贏盡世界盃、歐國盃、德甲等重大錦標。反觀勒夫長時間喺低組別聯賽打滾，寂寂無聞，直至10年前喺教練學校遇上奇連士文，命運從此改變。「奇哥」04年首執教鞭，即肩負重建德國隊重任，佢第一時間請來年長佢5歲嘅勒夫擔任副手。據悉，奇連士文當時角色僅為精神領袖，實際戰術部署及訓練工作都交由勒夫負責。

喺「奇、勒配」巧妙分工下，迅速打造出一支年輕有活力、球風進取嘅新德國隊，喺06年世界盃獲得季軍。奇連士文離任後，勒夫坐正帥位，並延續兩人共創嘅主攻風格，08歐國盃打入決賽，2010世盃再奪季軍，而勒夫亦躋身名帥行列，但佢並冇忘本，去年奇連士文喺美國備受下台壓力，勒夫率領一支以副選為主嘅德國隊，遠赴華盛頓同美國踢熱身賽，表面上賀美國足總成立百周年，實情係幫老友解困，喺德國防線多次犯錯下，嗰場波美國贏4比3，奇哥亦得以保住帥位。
當年舊部 報知遇之恩

從此美國愈踢愈順，仲捧埋美洲金盃冠軍，如非勒夫「送禮」，令美國翻生，恐怕「奇哥」未必有份參與今屆世盃，兩人雖各為其主，仍不忘互惠互利。唔好忘記德國大部分主力包括拿姆、舒韋恩史迪加、梅迪薩卡、普多斯基等，都係由奇連士文一手提拔出來，為報知遇之恩，點都唔會同奇哥作對。

值得一提，C朗為皇馬捧上屆歐聯冠軍過程之中，鬥3支德甲球隊史浩克04、多蒙特、拜仁慕尼黑，佢共轟入7球，勒夫同奇連士文為公為私，又點會放虎歸山先？