南韓谷行火攞尾彩

猪拉多纳

比利時晉級打Golf鬆一鬆

亞洲最後希望南韓今晚將於H組對比利時，能否出線仲要睇同組另一仗戰果，不過南韓都要做足本份，自己贏波先至有價講。「太極虎」對手比利時已經穩奪出線資格，今仗會畀後備上陣，而且成Team人仲休閒到去咗打Golf，Hea踢心態明顯，讓晒車馬炮之下如果南韓仲唔生性，真係無話可說，「太極虎」今場受讓必捧讓球主勝。

（TVB 13及19、now 818及840周五凌晨4時直播）

數字上南韓要出線首先要大炒比利時，雖然係難，但機會唔係冇，話晒波係圓嘅，球場上乜都可以發生，而且球隊上仗大敗畀阿爾及利亞，嚟到分組賽最後一仗，唔理最終結果會點，總之要搏埋條老命啦。
太極虎三箭頭搏殺

「太極虎」之前兩仗夾埋入咗三球，包括其中一球由俄羅斯門將送禮，今場為咗攞多啲入波，會用較進取嘅陣式，改踢三箭頭，由李根鎬、具滋哲及金信煜狂攻比利時後防，加埋後上嘅李青龍同奇誠庸，攻力都算有啲睇頭，希望利用速度可以搞到比利時後防出錯，但最緊要係佢哋體力要應付得嚟。

至於比利時已經出線，領隊韋莫斯將進行輪換，收起後防艾達韋列特、維頓漢、中場韋素及夏薩特等球員，曼聯嘅贊奴沙有望首次於世盃登場，仲有愛華頓嘅米拿拉斯亦會正選，加上華美倫上仗受傷缺陣，成個陣容會變化好大。

此外，由於比利時已經篤定入16強，尋日趁有時間去訓練基地附近個高爾夫球場打Golf，比利時中場迪科亞唔知係咪打到熱熱地，剝晒衫大騷胸肌同紋身，心態上明顯放鬆晒；如果南韓仲唔乘機搶分，真係好難同國內支持者交代。另外，兩軍今屆都攞唔得多角球，角球細亦可以留意。