俄羅斯爭出線大反擊

猪拉多纳

上仗表現一鳴驚人嘅「沙漠之狐」阿爾及利亞乘勇迎戰「北極熊」俄羅斯，兩軍都有出線機會，當中以贏過一場嘅阿爾及利亞秤高啲。不過，由卡比路執教嘅俄軍段估唔會坐以待斃，今場應會出齊架生同阿軍死過，互相搏拳之下入球大好路。

（TVB 01、now 801及841周五凌晨4時直播）

阿爾及利亞首戰比利時雖然輸波，但其實係佢哋首先取得入球，當時大家都認為佢哋好彩；但過埋第二輪分組賽，以4比2大炒「泡菜國」，呢個賽績話畀大家聽，佢哋真係有料到。
阿爾及利亞變陣有料到

其實阿爾及利亞最堅係領隊夏利荷錫，第一仗輸波之後，佢作出大幅調整，有五個位置作出改變，果然收到功效，尤其起用効力西甲CF格蘭納達嘅巴謙美，呢名「90後」盤扭、組織同為隊友製造機會嘅能力都好，跟同樣喺次仗先至上陣搏殺嘅施利文尼配合絲絲入扣，據報巴謙美獲得西維爾、維拉利爾及愛華頓等球會青睞，相信大家下季會較多機會喺電視直播見到佢。

至於俄羅斯更加唔使講，兩場累積只得一分，今場一定要全取三分先有價講，焗攻冇退路，頭兩仗被領隊卡比路放喺後備席嘅施哥夫同基沙哥夫，今場應該會正選上陣博殺，呢兩名球員雖然唔係卡比路心目中「有紀律兼聽話」嘅球員，但喺呢個非常時期都要用非常手段，卡比路就係要靠兩人嘅神來之筆，為俄羅斯帶來出線希望，兩邊都放手一博之下，今場入球大係最佳投X選擇。