美德安全波獻細

猪拉多纳

防守唔掂 唔敢亂攻

今晚G組矚目大戰美國對德國，形勢上佢哋只要和波就可齊齊晉級皆大歡喜，搞到外間對「默契波」嘅講法甚囂塵上。雖然兩軍教頭分屬「師徒」，小妹依然唔覺得佢哋會事先協議好和波咁冇體育精神，但就肯定兩軍會自動自覺踢「安全波」，唔會冒險亂咁進攻。況且德國自知後防唔掂，為防畀美國反擊得手，絕對唔會搶攻狂轟猛炸，咁嘅情況捧1.8倍入球細就啱數啦。

（TVB13及now818台、中央5台周五凌晨0:00直播）

「美德戰」前夕唔少記者都去搵兩軍職球員就默契波攞料，不過德國助教漢斯弗利克一早講明唔會同「奇哥」陣營有任何聯絡，德國大將曉姆斯仲超激動咁話：「咁樣實在太冇體育精神喇，我相信落得場踢嘅人都唔會有咁嘅諗法囉！」講真吖，小妹都唔相信佢哋真係會做啲咁唔光彩嘅事，仲有呀，近年事先張揚嘅所謂「默契波」根本好少成真，例如2012年歐國盃分組賽，西班牙最終並冇同克羅地亞戰成2:2踢意大利出局，今次嚟到全球注目嘅世盃，更加唔夠膽亂嚟啦！
湯馬士梅拿嗌隊友「定啲嚟」

不過兩隊就算唔係一心守和，都唔代表佢哋會玩對攻喎。德國前線球員質素雖高，但上仗畀加納入兩粒嘅後防就真係「吔吔烏」，中堅曉姆斯攻強於守，出名轉身慢嘅梅迪薩卡面對對手快速反擊好易「出事」，《圖片報》仲爆料話勒夫會繼續沿用表現未見穩定嘅拿姆做防中添。

可能湯馬士梅拿心知後防靠唔住，佢賽前都呼籲隊友「定啲嚟」：「我哋嘅最終目標係首名出線，但今場必須小心應戰，一唔小心就會渣都冇得剩！」言下之意即係叫隊友唔好亂咁攻，入到波就好收工喇。
美國2場失3粒唔亂攻

美國今屆表現予人驚喜，尤其喺冇當路雲下，丹普西接任「美國隊長」領軍打出好成績，不過嚟到今場搶到1分就晉級16強，兩場失3粒、兼有射手艾迪杜里續抖嘅「花旗兵」，相信都會乖乖哋踢番守勢波靜候反擊機會，唔會夾硬同技高一籌嘅德國硬碰，分分鐘又係悶戰一場呀！
Data King：近8戰7開半場細

‧美國近10仗取得5勝3和2負。

‧歷來曾6次同德國交手，取得3勝3負。

‧近8場比賽開7場半場細。

‧近3屆世盃第3場分組賽成績為1勝2負。
決賽周數據

美國 Vs 德國

2 場數 2

4 入球 6

3 失球 2

1 贏 1

1 和 1

0 輸 0