花旗7星德國製 默契波話係就係?

猪拉多纳

「美德大戰」今晚開打，呢兩隊波千絲萬縷，雙方主帥奇連士文同勒夫有幾好交情唔使多講，最過癮係包括「奇哥」同顧問福士在內，足足有7位「花旗兵」係「德國製造」，今仗會唔會好似坊間咁講打默契波呢？咁葡萄牙同加納係咪真係只可以「袖手旁觀」？又未必喎，總之今晚G組終極戰，結局隨時估你唔到！

咁多人都話今仗會打默契波，皆因奇連士文係德國球壇傳奇，昔日立咗幾多功勞大家有眼見，最重要係連勒夫都係由「奇哥」捧上德國主帥個位，呢兩師徒咁Friend，加上美國國家隊特別顧問福士亦係德國傳奇，又好難唔畀人話會打默契波嘅。
鍾斯尊敬勒夫入波唔慶祝

唔單止場外，就連場內都係「一家親」。美國中場鍾斯當年就係獲勒夫提攜入選「日耳曼兵團」，之後先至「變節」為美國効命，賽前佢仲話就算今仗入波都唔會慶祝，原因係唔想對「恩師」勒夫不敬。至於右閘法比安莊臣昔日就係德國U17至U21梯隊嘅鐵膽，5年前為德國出戰U21歐國盃嗰陣，仲同紐亞、曉姆斯、基迪拉同奧斯爾等人並肩作戰添。

同樣做過德國小國腳嘅仲有守將約翰布魯克斯同中場祖利安格連，加上喺德甲紐倫堡搵食嘅中場贊特拿，上述5位德裔美籍球員都係喺德國長大，今仗對呢5位「德國製造」嚟講可謂別具意義。鍾斯話佢5個好多時都會喺更衣室講德文，但隨住默契波話題愈吹愈熱，約翰布魯克斯似乎想「洗脫嫌疑」：「我着得美國球衣就係100%美國人，只會一條心為美國而戰！」
重演82世盃歷史？奇哥：嗰次西德係主角

雖然依家G組嘅形勢係美德只要和波就攜手出線，但面對咁多輿論壓力，係咪真係會「明目張膽」咁和波先？事實上，葡萄牙依家得失球差（-4）落後一大截，即使美國僅敗畀德國，葡軍亦要大炒加納先出到線，難度唔細。情況就好似1982年世盃，西德同奧地利夾計出線搞死阿爾及利亞。主帥奇連士文就話：「1982年單嘢西德係主角，唔係美國，美國人嘅DNA係全力爭勝，根本冇咩默契波嘅概念，我哋係去累西腓爭勝！」

「奇哥」咁諗冇錯架，C朗前日都承認「冇奢望過捧世盃」，又話葡萄牙國家隊「好平庸」，假如連呢位好勝「萬人迷」都心淡Hea踢，話唔定葡萄牙對加納會輸鑊甘，萬一美國真係「大安旨意」諗住僅負德國等出線，加納隨時後上都唔奇。總之今晚G組對決好睇過戲，球迷買定花生啦！