哥倫比亞捉冇牙烏圭

猪拉多纳

3捷氣勢勁 邪不能勝正

另一場16強全南美對碰，哥倫比亞於里約熱內盧馬拉簡拿球場鬥烏拉圭。哥倫比亞分組賽3戰全勝，上場對日本喺穩奪出線權嘅情況下，依然大炒對手四個一皮，表現正氣。相反烏拉圭前鋒蘇亞雷斯上場化身「咬人蘇」助球隊晉級，人神共憤，被罰停賽9場可謂罪有應得。今場正邪對決，烏拉圭冇咗「咬人蘇」戰力減半，波童信邪不能勝正，捧哥倫比亞上盤。

（TVB 13及19、now 818及840周日凌晨4時直播）

哥倫比亞係今屆4支分組賽全勝球隊之一，由於踢完兩輪分組賽後佢哋已篤定出線，為保留體力，領隊柏加文上仗對日本收起後衞耶比斯、沙柏達華倫西亞、辛尼加、中場阿古拿、前鋒杜費路古迪利斯，中場大腦占士洛迪古斯則只踢半場。雖然冇咗半隊主力，不過球隊表現完全冇走樣，替補球員包括梅開二度嘅波圖前鋒積臣馬天尼斯、代替「占士」負責喺中場派牌嘅左腳仔祖安昆特路全部交到功課，依家無論正選或後備，狀態、信心皆處頂峰，大有遇神殺神嘅氣勢。
烏拉圭缺「咬人蘇」差好遠

烏拉圭能夠於死亡之組突圍，某程度上係英格蘭、意大利表現更曳，而且前鋒蘇亞雷斯喺呢兩場比賽入面都擔當一個重要角色，尤其對英格蘭一仗，如果唔係靠佢個人精湛嘅埋門射術，球隊未必可以全取三分。

國際足協已經判罰「咬人蘇」停賽9場國際賽加禁賽4個月，今屆比賽唔使再預佢，從首場分組賽不敵哥斯達黎加所見，球隊冇咗蘇亞雷斯喺前線做竄擾，勉強將卡雲尼推前打箭頭只會造成雙輸局面，哥倫比亞小讓平半，上盤值得支持。
南美打吡烏軍稍佔上風

同樣係南美洲球隊嘅哥倫比亞同烏拉圭，以同洲份球隊嚟講對碰次數不算多，雙方只曾交手過38次，其中烏拉圭贏出18次，比起哥倫比亞嘅11次稍稍佔優，另外和局則有9次。而喺世界盃嘅歷史上，兩軍只曾經喺1962年智利世界盃分組賽相遇過一次，當時哥倫比亞憑住一個十二碼先開紀錄，但其後烏拉圭連下兩城，最終以2比1反勝對手。至於雙方最近一次嘅交手，係喺去年9月嘅世界盃外圍賽南美洲賽區嘅賽事，烏拉圭喺主場憑住史杜安尼同卡雲尼各入一球，以兩球淨勝哥倫比亞。
好評金哨有望吹決賽

古柏斯 Bjorn Kuipers

國籍：荷蘭　

年齡：41

曾執法大賽：歐聯、歐霸盃、12歐國盃、13洲際國家盃

簡介：本身喺荷蘭經營超級市場及髮型屋嘅古柏斯，今屆吹過英格蘭對意大利同瑞士對法國兩場歐洲大戰，兩場波都冇乜爭議性判決，兩場加埋只係畀過兩張黃牌，事實上佢上年主吹過歐霸盃及洲際國家盃決賽，表現備受好評，更獲球證網站《The Third Team》選為2013年最佳球證，仲好有機會執法今屆世界盃決賽，當然條件之一就係荷蘭入唔到決賽。

呢位金哨今屆賽事只係吹過兩場歐洲波，今場換成純南美球隊對決，比賽風格完全唔同，對佢嚟講算係一次考驗，睇吓呢位唔輕易出示紅黃牌嘅判官，會唔會喺今場「破戒」。
今屆派黃紅牌：

黃：2　　

紅：0

執法場數：83

黃牌數：301

紅牌數：17

判12碼：22

平均黃牌：3.63

平均紅牌數：0.20

平均判12碼次數：0.27
笛子波童推介：哥倫比亞上盤