驚佢有牙？哥倫比亞不勝無圭

猪拉多纳

話咁快世盃已經嚟到16強階段喇，C組「一哥」哥倫比亞喺分組賽3戰全勝，擸晒9分首名出線，超勁囉！呢個係佢哋決賽周分組賽歷來最好成績，最緊要係佢哋呢3場波勁演入球騷，攻擊力夠晒堅，特別係王牌殺手占士洛迪古斯弗到漏油，今晚呢場「南美洲內訌Part 2」，對住D組「二哥」、無咗「咬人蘇」蘇亞雷斯嘅烏拉圭，一定攻得更加輕鬆啦！哥倫比亞少讓平半，上盤好難唔捧喎！

（TVB13及now818台、中央5台周日凌晨4:00直播）

哥倫比亞上場對日本前已篤定出線，即使收起多名主將為16強留力，依然可以輕鬆大勝「藍戰士」4:1，實力唔講得笑。射手占士洛迪古斯弗到漏油唔在講，上場對日本省兩粒嘅積臣馬天尼斯，亦有啲料到。連贏3場嘅哥倫比亞家陣氣勢如虹，球員個個殺氣咁盛，仲唔係遇神殺神，遇佛殺佛？今場莫講對手係烏拉圭，對巴西都未驚啦！
半力照炒日本占士洛迪古斯勁弗

本來烏拉圭實力都有番咁上下，唔係點壓倒英格蘭同意大利出線呀！可惜佢哋嘅王牌蘇亞雷斯又闖禍，上場對意大利又咬人，即使即場冇畀球證睇到，但依家畀FIFA秋後算帳罰停賽，話就話烏拉圭鋒線上仲有卡雲尼同科蘭孭飛，但有睇過烏拉圭今屆賽事嘅朋友，都清楚知道「咬人蘇」有幾咁重要，卡雲尼同科蘭有幾「冇料到」，烏拉圭冇咗「哨牙蘇」同讓半臂冇分別，今場就算受讓平半都要唔過，撐上盤啦！
特別項目捧大賽球員高甸入波

烏拉圭後防高甸上仗對意大利頂入一球，今場先發事件買項目編號5︰高甸「入球」有成12.5倍抵博啦！隊長高甸被譽為大賽球員，逢大賽例有好表現，好似上場對意大利頭槌入波，仲有歐聯決賽為馬體會先入波。今場16強大戰，隨時一個角球頭槌建功，倍率好分值博。
Data King：近10次交手9開半場細

‧哥倫比亞近10場比賽取得6勝4和。

‧近10次對烏拉圭有9場開半場細，7次半場分到勝負。

‧之前只曾喺90世盃殺入16強，最後輸波出局。

‧已連續5場開入球大。
Data King：踢16強旺開細

‧烏拉圭近10仗取得6勝2和2負。

‧近10次對哥倫比亞取得6勝2和2負。

‧近8場比賽7場開半場細。

‧近3屆16強比賽（1986年、1990年同2010年），3場皆開半場細。
乜都玩錦囊：哥倫比亞搶攻捧讓主

哥倫比亞分組賽3場全勝出線，氣勢一時無兩，對手烏拉圭後防未必跟得上佢哋明快嘅進攻節奏。況且烏拉圭又有射手蘇亞雷斯停賽，攻擊力即時驟減，想入多球都難，3.55倍「讓球主勝」確實抵玩。