穩字行先半場冇高低

猪拉多纳

哥斯達黎加希臘神奇交守

世界盃16強最神奇戲碼，哥斯達黎加對希臘，前者不但喺死亡D組突圍而出，仲攞到首名出線；後者則再次創造希臘神話，上場臨完場絕殺科特迪瓦出線。今場兩隊交鋒，雙方都係踢法主守，嚟到淘汰賽更係穩陣行先，肯定會喺後防屯重兵，擺出「鐵馬陣」以防止對方衝擊，只係細盤得1.4倍冇肉食，科娜建議玩半場和。

（TVB13及19、now818及840周一凌晨4時直播）
哥軍出線 絕非靠符碌

「喂！你覺得死亡D組邊隊會出線呀？」「嗯，真係好難講喎，意大利係大賽專家，烏拉圭又有阿蘇，英格蘭班o靚仔就夠活力，仲有邊隊話？唔記得嘞！是但啦！嗰隊都出硬局o架啦﹗」以上嘅對話大家係咪都有同波友講過呢？的確，又有邊個會估到哥斯達黎加會喺死亡D組出線，仲要唔係靠符碌，而係靠實力2勝1和7分攞埋個首名，接連擊敗烏拉圭同意大利兩支世盃冠軍球隊，最尾再對另一支冠軍隊伍英格蘭，若然唔係要留力踢16強，分分鐘贏埋都唔出奇。

講到「神奇指數」，希臘亦絕對不亞於哥斯達黎加，喺C組第1場畀哥倫比亞大炒3蛋，第2場打少個下只能逼和日本0比0，去到最尾一場，科特迪瓦只要和都出線，以為死梗，點知希臘由前鋒森馬拉斯喺臨完場補時階段創出希臘神話，喺禁區內「自己踢自己」詐跌博得12碼，以2比1擊敗對手出線，真係神奇到你唔信﹗
誓死唔出 齊做大丈夫

不過講到尾，哥斯達黎加同希臘呢兩支弱旅能夠成就呢場「神奇Match Up」都係靠防守致勝，尤其係希臘鋒力尤其弱雞，因此打穩守突擊先係佢哋最耍家嘅武器，只要唔失波，就有機會入波，或者捱到加時同互射12碼，呢種打法係功利足球嘅贏波方程式，喺呢啲一場過嘅淘汰賽就更加啱使，預計今場雙方都會保持呢種穩守風格，做「大丈夫」，話唔出就唔出，保住不敗先再算，半場和絕對好路。
歷來首遇哥軍唔赦歐洲波

哥斯達黎加同希臘喺歷史上從未試過交手，而對於希臘嚟講今次對碰可能更新鮮，皆因喺過往兩次世界盃旅途連同今屆分組賽中，希臘從未試過喺決賽周遇過中北美洲嘅球隊。

相反喺哥斯達黎加角度去睇，佢哋對喺世界盃同歐洲球隊硬碰就絕對唔陌生。連同今屆賽事，哥軍喺4次參與世界盃嘅過程中，竟同歐洲球隊有過8次交鋒，不過就錄得3勝2和3負嘅不俗成績，表現絕不失禮。而其中喺今屆分組賽，哥斯達黎加喺分組賽面對英格蘭同意大利兩支歐洲傳統勁旅都可以保持不敗同不失球，足以證明佢哋對於對付歐洲球隊已經有一定辦法。
賓威廉斯 亞洲第１哨旺客隊

賓威廉斯

國籍：澳洲　

年齡：36

曾執法大賽：10世冠盃、11亞洲盃、12奧運

簡介：賓威廉斯正職係中學體育教師，所以體能有番咁上下，佢27歲就已經成為國際球證，執法超過100場澳職，現時係澳洲最具經驗嘅名哨，去年當選亞洲年度最佳球證，2012年於奧脫福球場擔正吹英國奧運首戰對塞內加爾嘅分組賽，今年踏足世界盃舞台，之前佢已經執法過洪都拉斯對厄瓜多爾同南韓對比利時，兩場波都無風無浪，但佢執法下有一個共通點，兩場比賽都係客隊勝，半全場都係開「和客」。
今屆派黃紅牌：

黃：7　　

紅：1

執法場數：79

黃牌數：327

紅牌數：28

判12碼：18

平均黃牌：4.14

平均紅牌數：0.35

平均判12碼次數：0.23
科娜推介：半場和