墨西哥頂到橙色風暴

猪拉多纳

馬基斯布防固若金湯

今晚續演16強賽事，頭場荷蘭於福塔雷薩卡斯特勞球場鬥墨西哥。「橙軍」荷蘭雖有隊長射手尹佩斯停賽復出，不過墨西哥今屆愈踢愈好，尤其由四朝隊長馬基斯領導嘅防線異常硬淨，強如東道主巴西都咬佢哋唔入，讓球主客和荷蘭讓一球，波童捧讓球客勝。

（TVB13及19、now 818及840周一凌晨零時直播）

荷蘭分組賽3戰全勝，攻入10球係分組賽入波最多嘅球隊，捲起一股「橙色風暴」，就算上仗冇咗停賽嘅尹佩斯都能淨勝智利兩球，足證佢哋依家信心爆晒棚。決賽周前唔少聲音都話荷蘭今次後防選咗太多後生仔，經驗係較弱一環，波童好同意。睇番佢哋分組賽對西班牙、澳洲都有失波，上場對智利保持不失，某程度上同對手賽前已出線及缺少進攻主力維達爾有關，防線不穩問題隨時畀呢張咁靚嘅分組賽成績表掩蓋咗。
兩隊都慢熱要埋「半場和」

同荷蘭相反，墨西哥能夠出線全靠一條穩健後防線。墨西哥今屆基本陣容同荷蘭首仗對西班牙時一樣打五名後衞，四朝隊長馬基斯經驗豐富，其餘赫達摩蘭奴、保羅阿古拿、拿恩正值當打之年，有速度兼有效率，足以彌補馬基斯體力上之不足，加上有對巴西時打到上晒身嘅門神奧祖亞把關，等閒之輩要攻入佢哋唔容易。墨西哥頭兩輪分組賽都冇失波，就算上場對克羅地亞都只係喺領先3比0嘅情況下，完場前稍一鬆懈先失咗本屆第一球。嚟到淘汰賽階段，防守較好嘅一方始終有着數，墨西哥受讓值得支持。

另外，墨西哥今屆慣咗下半場先發力，所有入波都係喺下半場取得，荷蘭頭三場分組賽亦係換邊後才奠定勝局，全部開晒「半場和」，今場不妨再追「半場和」。
對賽6次荷稍佔優

雖然荷蘭同墨西哥分別係歐洲同中北美洲嘅傳統勁旅，但歷年來兩軍竟然只對賽過6次，實在「估佢唔到」。睇番往績，荷蘭以3勝1和2負嘅成績稍稍佔優，但其實基本上六次對碰都係「一兩球上落」，加上大部分都係熱身賽，往績唔太可以作準。雙方唯一一次喺決賽周相遇，係98法國世盃分組賽，墨西哥逼和２比２。值得一提，荷墨兩軍對上一次交手已係4年前嘅事，當時荷蘭小勝2比1。
葡國名哨旺大比數

普恩卡

國籍：葡萄牙

年齡：43

曾執法主要大賽：歐聯、歐霸盃、10世界盃、12歐國盃

簡評：正職財務顧問嘅普恩卡來頭唔嘢小，喺球壇地位崇高，被譽為葡萄牙史上最傑出球證，2012年主吹歐聯及歐國盃決賽，並當選該年度國際足球歷史及數據統計協會最佳球證，今屆已經執法過喀麥隆對克羅地亞，以及日本對哥倫比亞兩場賽事，喺喀麥隆嗰場派過1面紅牌罰桑治出場，亦喺日本對哥倫比亞嗰場判罰日本12碼，咁啱兩場都係大比數賽事。

執法場數：91

黃牌數：344

平均黃牌數：3.78

紅牌數：15

平均紅牌數：0.16

判12碼：21

平均判12碼次數：0.23
荷蘭

主要後備：15古積特(中場)、17謝明蘭斯(前鋒)、18利萊費亞(中場)、20韋拿杜姆(中場)、21迪比(前鋒)

入球球員分布：尹佩斯、洛賓(3球)、迪比(2球)、迪維積、利萊費亞(1球)

入球時間分布：0-15分鐘(0球)、16-30分鐘(1球)、31-45分鐘(1球)、46-60分鐘(2球)、61-75分鐘(3球)、75-90分鐘(3球)

黃牌在身：迪維積、約拿芬迪根斯文、戴利白蘭特
墨西哥

主要後備：3沙斯度(後衞)、8馬哥法比安(中場)、9魯爾占美尼斯(前鋒)、14查維亞靴南迪斯(前鋒)、17比利素爾拿(中場)

入球球員分布：奧利比柏拉達、馬基斯、古亞達度、查維亞靴南迪斯(1球)

入球時間分布：0-15分鐘(0球)、16-30分鐘(0球)、31-45分鐘(0球)、46-60分鐘(0球)、61-75分鐘(3球)、75-90分鐘(1球)

黃牌在身：赫達摩蘭奴、保羅阿古拿、馬基斯
尹佩斯大賽淘汰賽入球荒

10年

世界盃決賽 荷蘭 0:0 西班牙

加時輸0:1

世界盃4強 荷蘭 3:2 烏拉圭

世界盃8強 荷蘭 2:1 巴西

世界盃16強 荷蘭 2:1 斯洛伐克

08年

歐國盃8強 荷蘭 1:1 俄羅斯

加時輸1:3

06年

世界盃16強 荷蘭 0:1 葡萄牙
笛子波童推介：墨西哥 讓球勝