荷蘭滾水淥腳墨西哥又老又慢等睇後防孭鑊！

猪拉多纳

今晚世盃繼續上演兩場16強好戲，當中小弟就睇好荷蘭同哥斯達黎加雙雙晉級，不過打淘汰賽後防表現隨時係勝負關鍵，尤其係荷蘭對墨西哥一戰，兩邊後防一隊滾水淥腳，一隊又老又慢，今晚實行買定花生等睇邊個孭鑊累街坊！

荷蘭首戰上演「二奶復仇記」擊潰大婆西班牙，無疑打咗支強心大補針。跟住接連搞掂澳洲同智利，成為4支喺分組賽贏晒3場嘅國家隊之一，「橙衣兵團」轟入10球更加係32強之冠，今場對墨西哥仲有尹佩斯復出如虎添翼！不過佢哋最煞食嘅始終係洛賓，打快速反擊時真係冇乜邊個追到佢，如果呢隻光頭快翼肯同隊友多啲配合，打吓撞牆，對方肯定防不勝防。除咗一對箭頭，迪比兩場換入嚟都有士哥，堪稱後備殺手，咪忘記仲有亨特拉爾喎，不過真係唔知雲高爾點諗，上場寧願用實力一般嘅蘭斯，都唔放亨特拉爾入場，真嘥料！
馬基斯追洛賓等食塵

不過荷蘭始終攻強守弱，華亞爾、迪維積同馬田斯恩迪經常滾水淥腳，遇着墨西哥前線幾隻老鼠仔，真係隨時睇佢哋唔住要孭鑊。好在論後防墨西哥都唔好得去邊，佢哋連續6屆躋身16強，門神奧祖亞一戰成名，今場肯定大把表演機會，事關靠老將隊長馬基斯鎮守後防，真係擔心佢嘅速度跟唔上「橙兵」，睇番首戰沙治奧拉莫斯都追唔到洛賓，馬基斯似乎都係食塵！

另邊廂「神奇球隊」哥斯達黎加分組賽對住意大利、英格蘭力保不失，贏烏拉圭亦只失1球，反映出佢哋嘅防守力唔錯，今戰應該頂得住攻擊力一般嘅希臘，入波就要寄望祖爾甘保同拜仁雷斯嘅反擊喇！佢哋喺死亡D組殺出血路，信心大增，有望突破1990年16強嘅最佳成績。希臘有隊長加素蘭尼斯波監刑滿復出，想延續神話就要靠運氣搭夠咯！