森巴足球算罷啦！

猪拉多纳

十六強打頭陣的巴西與智利，真係冇人估到會咬得咁緊，智利分組賽已有表現，居然面對主辦國才傾盡全力，幾乎置對手於死地。

最慘係巴西踢出個四不像來，所謂「森巴風格」，算罷啦！反擊似踢「趕鴨仔式」足球，一味靠湧！尼馬、侯克爆到就得啦，自然容易被智利球員睇死……死球戰術？又真係如願以償博到一粒，又如何，見到費特之平凡、換入來的祖奧更平凡，高中鋒冇計，就連最高身價後衞之一的堤亞高施華也甩底，守不穩攻不銳兼中場「冇腦」，成班球員連踢個form也做不到，只有肢體衝撞！
哥倫比亞領隊有料

同日哥倫比亞兩球完勝烏拉圭，勝方今屆一直以來表現出色，球員亦好有紀律，除領隊柏加文應記一功，占士洛迪古斯的窩利世界波更令他在射手榜暫領先；至於輸波嘅烏拉圭，本屆至此美妙組織欠奉，科蘭已不堪重用、僅卡雲尼超級賣力，高甸？其實唔係咁「高」啫！

八強由巴西對哥倫比亞，這場咖啡豆輸出國打吡，講好感梗係哥倫比亞，之但係經過教訓，巴西教練史高拉利可能更趨功利主義，這樣的巴西更難應付！最後都係要語重心長──贏，並不足夠，堂堂世界盃，怎能要球迷漠視內容議程，「我要摘星～不做俘虜」，這期間做球迷的香港人更交戰！