浣熊家族貼德國險勝

猪拉多纳

漢堡動物園玩估賽果

德國16強對阿爾及利亞前夕，漢堡動物園Hagenbeck特別請咗長鼻浣熊家族預測賽果，結果一共16隻長鼻浣熊經過一輪大混戰後，最終預測係德國「險勝」晉級。
力量指數分析8成入4強 2成闖決賽

呢間動物園早前搵過好多動物嚟做測試，好似大象、老虎、海龜同海象咁，不過最勁都係呢班長鼻浣熊，預測方法係將一啲佢哋鍾意食嘅提子乾同香蕉，用樹皮鋪上面，再放入兩個插上唔同國旗嘅大盒，睇吓邊一個最受歡迎。

其中一隻叫Pablo嘅長鼻浣熊之前估中德國大勝葡萄牙同打和加納，今次動物園就搵埋Maria、Mica、Miguel、Luisa、Pedro一家，連埋佢哋啲囝囝囡囡，加加埋埋總共16隻一齊玩，得出結果要影相先知係德國險勝。

另據ESPN足球力量指數（SPI）計算，德國晉級8強嘅機會達到80%，但係入決賽機會就跌至20%，捧盃機會更只得12%，唔知大家信長鼻浣熊定係數據分析呢？