比利時淡定標美會

猪拉多纳

兵源足力氣好Vs人腳少又頻撲

世盃16強最後一戰，H組首名比利時同G組次名美國於薩爾瓦多新起源球場交鋒，被寄予厚望嘅公眾黑馬「歐洲紅魔」比利時雖然喺分組賽贏晒，但演出同贏波過程都未能令捧場客同傳媒滿意，不過黑柴相信年輕嘅比利時經過三場險勝後，表現會愈嚟愈好，今晚遇上疲兵美國有力後上殺敵，1.78倍主勝係投X重心，扒冷門可敲4.5倍嘅半全場「和主」，同28倍嘅半全場「客主」。

（TVB 13及19、now 818及840周三凌晨4時直播）

比利時三場分組賽上半場入局都慢，但下半場換人後次次都大有起色，球隊至今4個入球全部喺下半場取得。黑柴認為唔係巧合，「紅魔」黃金一代個人能力強，既年輕又兵源過剩，有條件喺三場分組賽畀主力輪番休息，計後備力量，佢哋絕對係32強中最強，喺酷熱嘅天氣下作賽，場上球員體力消耗特別快，所以每當比利時喺下半場換人，一批生力軍即可發揮關鍵作用，球隊目前4個入球有3球就係後備取得。

雖然比軍今仗有右閘雲丹波里同中堅華美倫因傷缺陣，防守中場迪科亞停賽，後防大將高柏尼剛傷愈上陣成疑，但領隊韋莫斯仍然可以排出一個完整陣容之餘，仲有盧卡古、贊奴沙、查迪尼、迪比利同奧歷治呢班優質生力軍坐喺後備席，等待對手力弱時上陣屈機。何況比利時喺最後一場分組賽對南韓時，主力包括奇雲迪布尼、盧卡古同韋素都得到輪休，大將夏薩特到完場前至落場輕舒腳頭，養精蓄銳等今場。
「和主」、「客主」可一試

美國喺奇連士文帶領下，表現同精神面貌都大獲好評，不過陣中球員個人能力已經唔及比利時，可用嘅兵源又十分有限，三場分組賽嚟嚟去去用嗰十三、四個，所以除首仗反勝加納外，對葡萄牙同德國都輸後勁。何況美國喺巴西選擇駐營時未有考慮同比賽場地嘅距離，搞到三場分組賽嘅飛行里數超過一萬公里，係32強中最奔波嘅一隊，相反比利時就只飛咗1,368公里，係32強中飛得最少嘅一隊，今晚比軍以逸待勞，可以睇定後上制勝，除主勝外，「和主」同「客主」有好分頭都值得一試。
美國5次對陣輸4場唯一勝仗84年前！

比利時喺同美國嘅對碰中佔盡優勢，5戰取得4勝1負。事實上，美國取得嘅唯一一次勝仗已係84年前，即係1930年嘅事，當時美國喺世盃分組賽以3比0擊敗對手，而呢次亦都係兩支球隊唯一一次喺決賽周碰頭。不過時移世易，往後美國對住比利時都冇運行，最近一次係舊年美國喺主場以2比4不敵比利時，再一次被食住。
塌牆死人場波照踢冷血判官

海默迪 Djamel Haimoudi

國籍：阿爾及尼亞　

年齡：43

曾執法大賽：非國盃（08、12、13）、11世青盃、12世冠盃

簡介：海默迪做咗4年國際球證，吹過世青盃及世冠盃，最受爭議係09年世盃外科特迪瓦主場對馬拉維開賽前，球場一面牆倒下搞到人踩人，釀成22死過百人傷，但海默迪堅持賽事繼續進行，令人懷疑佢係咪有問題，不過海默迪今屆執法表現尚算正常，吹過荷蘭3比2贏澳洲同哥斯達黎加0比0和英格蘭，兩場加埋只派咗5張黃牌，罰過荷蘭一個12碼。

執法場數：67

黃牌數：223

紅牌數：10

判12碼：16

平均黃牌：3.33

平均紅牌：0.15

平均判12碼次數：0.24
今屆派黃紅牌：

黃：5　　

紅：0
蘇斯黑柴推介：比利時勝/和主/客主