機動花旗兵唔赦冇牙紅魔

猪拉多纳

熱刺傳奇 單挑英超後輩！

奇哥單挑英超後輩！世盃奪標熱門之一嘅比利時，喺分組賽3戰全勝，以H組首名資格晉級16強，不過大家咪以為佢哋好勁喎，查實「紅魔」同組對手只得俄羅斯、南韓同阿爾及利亞，而且呢3場波入面，比利時都係幾經辛苦先贏到1粒，今晚嘅對手換上由熱刺傳奇、前德國教頭奇連士文領軍嘅美國，真係未必讓得起，「讓球主客和」美國受讓有1.9倍，捧得過！

（TVB13及now818台、中央5台周三凌晨4:00直播）

比利時雖然3戰全勝，但3場波只係入得4球，同其他勁旅如荷蘭、巴西、法國等相比，鋒力真係拍馬都追唔上！佢哋喺分組賽階段對住俄羅斯、南韓同阿爾及利亞呢啲二、三線球隊，根本贏就係應該，家陣嚟到16強階段，先係佢哋真正嘅考驗！
比利時冇經驗3戰僅入4粒

冇錯，「紅魔」陣中可以話係粒粒皆星，夏薩特、贊奴沙、盧卡古等等，全部都係英超豪門嘅當家球星，熱刺3子查迪尼、迪比利同維頓漢亦係比利時嘅主力骨幹，不過咁喎，之前「阿倫」歐偉倫都講過啦，英超並唔係大晒，英格蘭踢成點已經有辦你睇啦，唔係仲信名牌呀？況且成班「紅魔」都好年輕，講經驗真係輸晒，好似喺「比俄大戰」入面做英雄嘅奧歷治，只係得19歲人仔，有冇足夠嘅心理質素去Keep住有貨交，亦係一個疑問！前鋒盧卡古同米拿拉斯又好似唔識入波咁，「紅魔」冇牙，又點捧得過呀？
奇哥有料美國似日耳曼軍

美國喺今屆世盃嘅表現可以話係超水準，雖然佢哋喺最後一場分組賽輸畀德國0:1，但「花旗兵」成場波都踢得好好，賽後就連美國總統奧巴馬，都大口氣到話美國可以捧到世盃添！係就係誇張咗啲，不過「花旗國」真係有料到o架，尤其係小妹兒時偶像奇連士文，佢將整支質素平庸嘅美國隊，改造成超機動、鋒力又強嘅巨人殺手，成支翻版德國隊咁，強如正牌嘅「日耳曼軍」，都曾經畀佢麾下嘅「花旗兵」搞到雞毛鴨血，葡萄牙更加要幾經辛苦先逼和到佢哋添！小妹就唔信比利時會勁得過德國喇，一於撐美國保持不敗啦！
Data King：淘汰賽旺半細

‧比利時近10場比賽取得6勝2和2負。

‧90年後曾經對過美國4次，錄得全勝。

‧喺86年、90年、94年同02年闖入決賽周16強，開咗3場半場細。

‧越位次數為14次，喺32強之中排第2多。
Data King：對歐洲隊輸唔晒

‧美國近10場比賽取得5勝2和3負。

‧近8戰7度開出半場細。

‧近5次對歐洲球隊取得2勝1和2負。

‧喺94年、02年同2010年3場16強比賽入面，半場同全場都係開細。
乜都玩錦囊：紅魔得個樣冇攻細

「歐洲紅魔」比利時今屆3場波都係僅贏1球，擁有星級陣容，不過攻勢卻只係「雷聲大、雨點小」，對家美國火力都係弱過藥煲，前鋒艾迪杜里仲未必出得添，得番丹普西一個，梗係捧1.62倍嘅入球細啦！