阿根廷攻爆瑞士

猪拉多纳

Kun打柴拿維斯一樣掂

阿根廷冇阿古路一樣掂！阿根廷今晚會喺16強同瑞士爭晉級，雖然前線重心之一嘅阿古路好大機會養傷唔出得，之不過「潘帕斯雄鷹」兵多將廣，頂替佢嘅拿維斯級數都有番咁上下，我覺得佢哋要贏瑞士絕對冇問題。阿根廷讓1球，梗係要撐1.9倍上盤啦！

（TVB13及now818台、中央5台周三凌晨0:00直播）

雖然我唔多滿意阿根廷喺分組賽嘅表現，但呢支南美勁旅領隊沙貝拉經驗老到，球員大賽經驗十足，深明再係咁踢未必可以走得好遠，一定會作出適當改變。而今場可能係一個唔錯嘅試金石，因為對手瑞士淨係識得恰弱隊，一遇強隊即時現晒形，即使前鋒阿古路左腳傷勢未好番缺陣都冇有怕。
美斯披甲10周年搏命

事實上，今場代替Kun上陣嘅拿維斯都唔嘢小，呢位効力巴黎聖日耳門嘅前鋒以速度快、腳法好同走位靈活見稱，而且又肯回後同中場搓波，同埋拉邊扯開對方防線，有佢喺前面，希古恩同Fit到漏油嘅美斯將有更多空間發揮。況且原來美斯喺04年6月29日首次披起阿根廷國家隊球衣，為阿根廷U20上陣，今場就係佢為國出征10周年紀念，唔使講美斯今場梗係加多兩錢肉緊啦！
瑞士虛火欺善怕惡

其實睇番瑞士3場分組賽，擊敗嘅厄瓜多爾同洪都拉斯實力只係一般，第2場對法國就即時暴露防線不穩嘅問題。「瑞士美斯」梳頓沙基利上場對洪都拉斯雖則大演帽子戲法，好似終於入到局咁，但我認為只係虛火，阿根廷要應付佢一個，可以話係綽綽有餘，要贏欺善怕惡嘅瑞士可以話冇難度，上盤撐得過！
Data King：往績食住歐洲列強

‧阿根廷近10場比賽取得7勝2和1負。

‧1990年後出現3次對賽，成績為1勝2和。

‧自2013年起近5次對歐洲球隊賽績為4勝1和。

‧近5屆世盃16強比賽有3場開大。
Data King：場分組賽全開大

‧瑞士近10場比賽取得7勝1和2負。

‧近兩次世盃16強戰（1994及2006年），皆開半場細。

‧對上一次闖入8強比賽，已經要數到1954年，距離依家有成60年。

‧近3場分組賽射門次數為51次，32強中排第4多，並全開入球大。
乜都玩錦囊：阿根廷慣咗開半

阿根廷雖然喺分組賽表現麻麻，但除咗第2場對伊朗外，佢哋都成功喺半場取得領先優勢。連埋今年另外3場熱身賽，6場當中有4場可以喺半場領先，今場對住瑞士2.02倍嘅「半場主勝」值得再追。