無鋒森巴咬唔入哥倫比亞

猪拉多纳

尼馬受制即難發圍

世界盃8強大戰，「無鋒」巴西難攻陷哥倫比亞！巴西今屆最為人詬病係缺少一位獨當一面正前鋒，無論費特或祖奧都係「敗仔家」，埋門把握力極差，只能靠晒尼馬食胡，但呢位森巴新世代球王有傷在身，發揮勢必受影響。巴西遇上有「新男神」占士洛迪古斯助陣嘅哥倫比亞，唔好話要贏，甚至可能被對手反咬番轉頭。巴西讓半一，必揀哥倫比亞下盤。

（TVB13及19、now818及840周六凌晨4時直播）

巴西有主場之利，卻欠霸氣，由首場分組艱辛反勝克羅地亞，次仗同墨西哥互交白卷，都畀唔到人信心。16強鬥智利，亦佔唔到甜頭，加時末段如非門楣「幫手」救番一命，恐怕已執包袱。

歸根究柢都係巴西領隊史高拉利放棄傳統幼細悅目組織踢法，追求體力壓迫，但防守唔見特別穩陣之餘，大大削弱攻力。進攻欠缺板斧，一旦尼馬被對手緊纏，就只能靠高Q大棍長傳，但呢種踢法明顯唔適合巴西，尤其費特、侯克、祖奧腳頭無靈，被嘲諷為巴西史上最差前鋒組合，旨意佢哋入波，就真係冇運行。
占士之外仲有古達度

另外，巴西防守中場路爾斯古斯達禾今仗停賽，無論用荷西保連奴代替佢，或將大衛雷斯推前擔任防中，都會影響史高拉利嘅部署，加上尼馬有傷在身，攻守都存在隱憂。

哥倫比亞成功演繹真正防反戰術，關鍵在於夠快速同機動，傳射技術超卓嘅「J神」占士洛迪古固然係重要角色，右翼古達度亦值得留意，此子個人突破能力強，可憑一己之力拉開對手防線，為隊友製造攻門機會。

唔好忘記哥倫比亞仲有上季葡超神射手積臣馬天尼斯，佢哋今屆11個入球，由6位球員取得，攻擊點夠多，哥倫比亞進攻人腳質素，比巴西有過之而無不及。哥倫比亞受讓半一，下盤固然抵玩，甚至有能力90分鐘內贏波，4.7倍客W亦可一試。
巴西食住哥倫比亞

南美傳統勁旅巴西同哥倫比亞雖屬同一洲份，但歷年來只係對過25次，對比起其他南美內訌，次數上相對較少。不過睇番往績，巴西對住哥軍竟然錄得15勝8和2負，兼且狂數55球只失11球，可以話係壓倒性佔優。哥倫比亞對上一次擊敗巴西已經要數到1991年嘅事，喺美洲國家盃分組賽以兩球淨勝對手。兩軍最近一次嘅碰頭係2012年嘅熱身賽，當時以1比1言和。值得一提係雙方以往從未喺世界盃決賽周相遇，只曾喺外圍賽見碰頭，哥倫比亞係從未贏過對手。
問題判官今屆No Problem

國籍：西班牙

年齡：43

曾執法大賽：西甲、歐聯、歐霸盃、12歐國盃

簡介：卡波路可算係「問題球證」，其「代表作」必定係上屆歐國盃揭幕戰希臘對波蘭，上半場先將希臘守將柏柏斯達夫普路斯趕出場，換邊後又向波蘭門將施捷斯尼出示紅牌，兩個判決都具爭議，幸好今屆世盃至今表現尚算正路，之前吹過烏拉圭2比1贏英格蘭，同埋波斯尼亞3比1贏伊朗，兩場共通點係入球大細都開大，而且對賽雙方都有入球，刨波嗰陣不妨參考吓。

執法場數：55

黃牌數：201

平均黃牌：3.65

紅牌數：5

平均紅牌數：0.09

判12碼：18

平均判12碼次數：0.33
巴西

主要後備：16拉美利斯(中場)、19韋利安(中場)、21祖奧(前鋒)

入球球員分布：尼馬(4球)、奧斯卡杜斯山度士、費特、費蘭甸奴、大衞雷斯(各1球)

入球時間分布：0-15分鐘(0球)、16-30分鐘(3球)、31-45分鐘(1球)、46-60分鐘(1球)、61-75分鐘(1球)、76-90分鐘(2球)

黃牌在身：尼馬、拉美利斯、堤亞高施華、侯克、祖奧、丹尼爾
哥倫比亞

主要後備：4辛迪亞高阿里亞斯(後衞)、15阿歷山大美查(中場)、19阿祖安拉莫斯(前鋒)

入球球員分布：占士洛迪古斯(5球)、積臣馬天尼斯(2球)、保羅艾美路、古達度、杜費路古迪利斯、祖安昆特路(各1球)

入球時間分布：0-15分鐘(1球)、16-30分鐘(2球)、31-45分鐘(0球)、46-60分鐘(3球)、61-75分鐘(2球)、76-90分鐘(3球)

黃牌在身：古亞連、山齊士摩蘭奴、保羅艾美路
Mic少推介：哥倫比亞(下盤)