「哥斯拉」食到荷蘭橙

猪拉多纳

神奇兵團驚喜不斷！

話咁快，今屆世盃就踢到剩番8隊，睇番16強出線賽果，基本上全無爆冷，雖然唔少球迷都覺得班傳統勁旅贏得嚟冇乜說服力，不過小弟就唔係咁睇，反而覺得佢哋都具備冠軍隊應有嘅素質添！不過咁，鍾意刺激嘅球迷又唔使失望，一日「神奇哥斯拉」哥斯達黎加仲有份留低，一日都仲有驚喜！

喺小弟眼中，大熱門好似巴西、德國同阿根廷咁，如無意外都可以順利殺入4強。巴西對智利嗰場，唔少人都話「森巴兵」唔值得晉級，其實睇真啲，基本上佢哋全場控制大局，到互射12碼階段，更見到呢支5屆世盃冠軍展現出強隊應有嘅心理質素，「騰晒雞」嘅智利直頭比下去，所以今晚8強鬥哥倫比亞，照計都可以順利打入4強。

至於阿根廷鬥瑞士嗰場，「阿軍」嘅優勢就更加明顯，如果唔係對手門將「上身」，根本唔使拖到踢加時。只要美斯壓陣，憑佢嘅「靈光一閃」，要再進一步唔係難事。德國領隊勒夫用人排陣雖然勁騎呢，但若然曉姆斯及時復出，絕對有能力殺敗今屆仲未遇過真正考驗嘅法國。
遇強敵冇怯場堅持自己風格抵讚

唯一小弟仲未「參透」嘅，就係牌面上強弱最懸殊嘅荷蘭對哥斯達黎加！無可否認，「橙衣兵團」實力上一定超晒班，而且尹佩斯、史奈達同洛賓都係可以獨力改寫戰局嘅球員，牌面着數晒。不過有睇過哥斯達黎加比賽嘅朋友都知，呢隊波亦唔係好恰，雖然領隊路爾斯賓圖謙稱自己有心學莫連奴嘅防反足球，但「哥斯拉」踢落進取得多。上場鬥希臘，如果唔係到下半場踢少一個，絕對有能力喺90分鐘內KO對手。除咗拜仁雷斯大爆發，更重要嘅係呢班波已經踢起咗團火，對住強敵都唔怯場兼且仲可以堅持自己風格。若果荷蘭聽晚又踢番上場對墨西哥時嘅不濟表現，哥斯達黎加有望再創歷史。