哥斯達黎加任務已完成

猪拉多纳

今晚兩場世盃8強賽事，度士幾睇好荷蘭贏波晉級，除咗因為人腳及經驗遠在哥斯達黎加之上，最關鍵因素係哥斯達黎加已經搏到殘，加上歷史性晉身8強，亦已算完成任務，鬥心可能唔及之前堅定，好難抵擋爭標分子荷蘭。預料荷蘭可以淨贏兩球或以上，讓一球、球半，照捧上盤。
見步行步難敵荷蘭

哥斯達黎加可以喺死亡之組擊敗烏拉圭同意大利，的確令人刮目相看，其實唔多唔少係因為賽前對手對佢哋欠缺了解，甚至有輕敵之心所致。加上哥斯達黎加亦好落力，使出渾身解數搶逼，令對手措手不及。不過，呢種踢法非常消耗體力，哥斯達黎加16強對希臘，仲要10人應戰踢至加時，對球員身體負荷更加大，近日傳出傷病問題，反映靠一股蠻力，難以維持長久。

事實上，哥斯達黎加亦估唔到自己入到8強，每場當決賽搏盡，見步行步，以佢哋班底，來到8強應該係極限。荷蘭攻力強，洛賓、尹佩斯都係世界一級進攻球員，要撕破對手防線並唔難。另一場阿根廷亦有一對好拍檔美斯同迪馬利亞，兩人有腳法、有速度，傳得射得，令對手防不勝防。比利時球員始終比較年輕，整體表現中規中矩，唔係阿根廷對手。