荷蘭唔識搶攻 最怕防反專加

猪拉多纳

世盃4強最後一個席位，將由荷蘭同哥斯達黎加爭奪。荷蘭喺首戰表現令人眼前一亮，但之後鬥澳洲、16強撼墨西哥，就見到晒呢班波嘅弱點：一主攻就出事！今晚佢哋對住牌面較弱嘅哥斯達黎加，肯定又要主攻，需知道哥軍正正係「防反」高手，「橙軍」唔係劑劑都咁好彩可以反勝，荷蘭讓唔起1/1.5球，博哥斯達黎加下盤啦！

（TVB13及now818台、中央5台周日凌晨4:00直播）

荷蘭首戰之所以大勝西班牙5:1，正正係因為佢哋專心防守等人攻，前面靠洛賓同尹佩斯打反擊，結果咪清脆贏波囉，但去到第2戰鬥澳洲，荷蘭焗住主攻，最終幾經辛苦先反勝到對手。16強撼墨西哥就仲衰，證明咗佢哋係唔識踢上風波嘅，若果唔係洛賓臨完場前「博」到12碼，出埋局都唔奇啦！
尼祖迪莊打柴 防線冇人掃蕩

好嘞，今晚荷蘭對住哥斯達黎加，9成9都係要主導比賽喪攻喇，活生生有2場波畀你睇辦，唔係仲信「橙軍」呀？再講，荷蘭套戰術係倚重防中去做掃蕩，去減輕防線班後生仔嘅壓力，可惜佢哋嘅首席「掃把佬」尼祖迪莊，因為大腿受傷緣盡世盃，最大鑊係賽前仲傳出尹佩斯練波嗰陣整親，上陣成疑，今戰就算落場都要紮住上，咁多不明朗因素，點撐？
哥斯達黎加中堅停賽一樣掂

對面嘅哥斯達黎加今屆表現一鳴驚人，一套「穩守突擊」戰術更加係玩到出神入化。而且呢班波係堅踢整體戰，跑上跑落去彌補質素不足，冇話冇咗邊個會冧檔，所以佢哋件中堅奧斯卡杜亞迪雖然要坐波監，但一樣冇有怕。仲有一點，就係今屆世盃各隊波嘅實力好平均，16強已經有5場要踢到加時先分到勝負，依家嘅8強，更加係8隊分組賽冠軍，隊隊都有料到，哥斯達黎加竟然仲受讓1/1.5球，簡直係筍到爆，唔係唔捧呀？
Data King：強戰愛開大

‧近10場比賽取得6勝3和1負成績。

‧近3屆8強戰（2010年﹑1998年同1994年）全部開大。

‧今屆世盃比賽已連續4場開半場和。

‧喺決賽周12球入波中，洛賓同埋尹佩斯共攻入6球，佔50%。
Data King：連開8口半場細

‧近10場比賽取得3勝3和4負。

‧近8場比賽全部開半場細。

‧近4場對住歐洲球隊賽事，取得1勝3和成績。

‧整體球員身價只有2,963萬歐元（約3.13億港元），為32強之中最低。
乜都玩錦囊：荷蘭咬唔入龜殼博和

荷蘭主動出擊唔多掂，今場對住擺明打反擊嘅哥斯達黎加，淨係諗點攻破對方「龜殼」都有排頭痛。哥軍想喺90分鐘K.O.對手亦唔容易，3.9倍和波值得一試。