肯薩斯門神上身細滅火燄

猪拉多纳

「弱旅出鋼門」，今屆巴西世盃多位名不經傳嘅門將成功彈起，例如奧祖亞、麥保希、基羅拿華斯，個個都上晒身咁作出多次神救，令球迷拍案叫絕。肯薩斯體育會雖然喺美職唔算係弱旅，不過都有卡朗貝治呢位鋼門，今場主場對芝加哥火燄，有佢把關，細盤同主勝均可一博。

(TVB 301周一凌晨3時直播)
卡朗貝治獲選6月最佳

肯薩斯體育會門將卡朗貝治雖然冇入選到美國世盃大軍，不過唔代表佢守龍門嘅身手唔好，當球隊失去咗兩位要為美國出戰世盃嘅重心球員，中場格拉咸素斯同中堅馬特比斯拿嘅時候，肯薩斯體育會仍然能夠以兩連勝保住東岸榜首地位，贏波功臣一定係卡朗貝治，佢用出色嘅表現幫球隊保住不失，保持勝局，呢位31歲守門員更因而獲粉絲選為六月最佳球員，就知佢有幾勁，幫咗球隊幾多。

後場有卡朗貝治頂住，不過肯薩斯體育會進攻就唔係好掂，進攻泉源、創造型中場格拉咸素斯啱啱先歸隊，今場對芝加哥火燄未必能夠出戰，而翼鋒東尼洛迪古斯又要坐波監，雖然芝加哥火燄防守唔算特別硬淨，肯薩斯體育會今場要贏唔難，但多數都係小勝格，入球細同主勝都值得捧場。