德國衝散森巴爆炸兵團

猪拉多纳

巴西陣腳大亂 難擋對手變招

世盃準決賽首仗即爆發大戰，兩大奪標熱門巴西同德國狹路相逢，東道主巴西喺前後場兩大領袖尼馬同堤亞高施華雙雙缺陣下攻守實力大打折扣，尤其攻擊線頓失重心，領隊史高拉利相信會被迫大踢更具防守性嘅功利足球，不過球員級數同兵源都唔及德國，喺下半場恐難抵禦德軍變招，平手盤黑柴撐德軍之餘，可以博埋半全場「和客」。

（無綫翡翠台及明珠台、TVB 13及19、now 818及840台周三凌晨4時直播）
尼馬缺陣打亂大菲部署

巴西於半準決賽擊退今屆奇兵哥倫比亞，卻付出沉重代價，王牌尼馬重創，後防重心兼隊長堤亞高施華累積兩面黃牌要停賽，前後重心都唔踢得，球隊整體級數大降。經驗豐富嘅領隊史高拉利今次老貓燒鬚，放棄卡卡同朗拿甸奴等大牌球星，一心圍繞尼馬作為進攻命脈，其餘中前場球員都只係佢嘅綠葉，尼馬喺今屆賽事亦不負所託，但佢嘅缺陣就帶嚟咗災難性影響，史高拉利今場預算會以車路士中場韋利安代替尼馬，呢位中場雖然勤於走動，但級數同創造性無法同尼馬相提並論，何況佢亦喺操練中受輕傷，令史高拉利頭痛不已。

除咗韋利安代替尼馬，巴西今仗亦被迫用丹迪代替堤亞高施華扼守中路，丹迪係一名合格嘅中堅，但無法同領袖級嘅堤亞高施華相比，要佢包抄埋輕出嘅拍檔大衞雷斯位置，相信會加倍吃力。至於前線冇咗尼馬就頓失重心，費特、奧斯卡杜斯山度士同侯克喺今屆賽事表現都麻麻，踢得唔好嘅時間比好嘅時間更多，預料「大菲」史高拉利會要求球隊踢得更保守，仲可能會以求和為目標，將比賽拖到加時甚至互射12碼。
勒夫半場掣隨時得米

德國上仗贏法國演出亦唔算亮麗，不過領隊勒夫經過頭4場比賽亂點鴛鴦後，終於將球員放番喺佢哋合適嘅位置，球隊整體演出當堂穩健番，球隊防線除紐亞同曉姆斯兩大支柱外，將隊長拿姆移後可做更多包抄工作，德軍防線足以頂住巴西有限嘅攻力，而且隊中前場具創造力球員遠比對手多，勒夫喺下半場有大把變招空間，黑柴相信比賽喺上半場會較為膠着，但當德軍喺下半場換入高路斯、舒賀爾尼或者馬里奧葛斯等生力軍後，就好有機會絕殺東道主，半全場「和客」有5.9倍好分頭值得一試。
巴西

主要後備：2丹尼爾(後衞)、8荷西保連奴(中場)、16拉美利斯(中場)、18靴蘭尼斯(中場)、21祖奧(前鋒)

入球球員分布：尼馬(4球)、大衞雷斯(2球)、奧斯卡杜斯山度士、費特、費蘭甸奴、堤亞高施華(各1球)

入球時間分布：1-15分鐘(1球)、16-30分鐘(3球)、31-45分鐘(1球)、46-60分鐘(1球)、61-75分鐘(2球)、76-90分鐘(2球)
德國

主要後備：17梅迪薩卡(後衞)、23基拉馬(中場)、19馬里奧葛斯(中場)、9舒賀爾尼(前鋒)、11高路斯(前鋒)

入球球員分布：湯馬士梅拿(4球)、曉姆斯(2球)、馬里奧葛斯、高路斯、舒賀爾尼、奧斯爾(各1球)

入球時間分布：1-15分鐘(2球)、16-30分鐘(0球)、31-45分鐘(2球)、46-60分鐘(2球)、61-75分鐘(1球)、76-90分鐘(1球)、加時(2球)
牧師判官睇漏咬人蘇

國籍：墨西哥

年齡：40

曾執法大賽：世界盃(06、10)、美洲金盃(05、07、09、11、13)、世少盃(03、05、13)

簡介：摩連奴係一名牧師，希望開間福音戒毒所幫人，而佢嘅國際球證生涯亦超過10年，吹過06及10兩屆世盃，今屆暫時吹過比利時2比1勝阿爾及利亞，該仗開賽初段判罰比利時12碼，另一場就係轟動全球嘅烏拉圭1比0勝意大利，佢先以直接紅牌將意大利中場馬治斯奧趕出場，之後蘇亞雷斯咬人又睇唔到，間接令意大利出局，國際足協竟然搵佢吹巴德大戰，唔知到時又會發生咩事！

執法場數：81

黃牌數：356

平均黃牌：4.40

紅牌數：52

平均紅牌數：0.64

判12碼：30

平均判12碼次數：0.37
今屆執法：

6月18日 H組 比利時 Vs 阿爾及利亞

6月25日 D組 意大利 Vs 烏拉圭

今屆派牌：黃：6 紅：1
02決賽大哨KO日耳曼

巴西同德國喺每次世盃決賽周都被視為大熱門，事實上兩軍每次大賽多數都可以殺入淘汰賽階段，但02年韓日世盃決賽係雙方唯一一次喺決賽周相遇，當年巴西喺法定時間憑住朗拿度梅開二度，以兩球解決對手封王。論整體對賽往績，森巴兵團以12勝5和4負傲視日耳曼軍團，39個入波亦令對方俯首稱臣，德國只曾24次攻破巴西大門。兩隊最近一次碰頭已係2011年嘅事，德國喺熱身賽主場迎戰巴西，憑住馬里奧葛斯、舒韋恩史迪加同舒賀爾尼三名現役國腳嘅入波，以3比2力克對手。
蘇斯黑柴推介：德國 平手盤、和客