德國齊心復仇 圍攻殘陣巴西

猪拉多纳

德國連續4屆決賽周殺入4強，創造世盃歷史，真係唔到你唔服！查實以「日耳曼軍」嘅實力，的確有力問鼎冠軍寶座，而且佢哋今晚嘅對手巴西，除咗有王牌尼馬打柴、又有隊長堤亞高施華停賽，攻守兩大重心冇晒，點踢呀？德國喺02年世盃決賽不敵巴西，今晚係時候嚟個了斷喇！足智彩開平手盤，我捧1.85倍嘅德國！

（無線翡翠台、明珠台、TVB13及now818台周三凌晨4:00直播）
連續4屆入4強創紀錄

德國喺8強以1:0力挫法國，雖然贏得唔夠說服力，但以咁多支歐洲球隊嚟講，「日耳曼兵團」都算係最穩定嘅一隊喇。睇番轉頭，德國先喺02年決賽畀巴西技術性擊倒，之後連續兩屆攞季軍，睇落好似冇乜冠軍命咁，但從另外一個角度睇，呢班波真係好識踢大賽，即使佢哋陣容幾弱都好，都能夠殺入4強，相當唔嘢小。

事實上，以德國上屆世盃嘅人腳，早就應該捧走大力神盃，只可惜當年唔夠運，慘被如日方中嘅西班牙Out走啫，呢4年間，班年輕「日耳曼兵」已經大熟大勇，奧斯爾、湯馬士梅拿、曉姆斯等等，全部已經獨當一面，齋計人腳，呢隊德國分分鐘係4強中最強嘅一隊添！

「日耳曼軍」今場應該會排番上仗砌低法國嘅陣容，隊長拿姆踢右閘，加強邊線攻擊力。雖然呢個陣屈咗馬里奧葛斯打後備，但以葛斯仔嘅速度，喺比賽末段入替體力唔夠嘅奧斯爾，效果可能仲好。
巴西讓勻「車馬炮」

對面嘅巴西唔止有隊長中堅堤亞高施華坐波監，王牌尼馬更喺8強畀哥倫比亞守將辛尼加撞到腰椎骨裂，提早告別世盃。佢嘅替身韋利安日前練波，又畀靴蘭尼斯撞傷臀部，今仗唔知出唔出得。雖然韋利安話自己可以上陣，但狀態一定會受影響，「森巴兵團」本身嘅鋒力已經唔多掂，依家仲要讓勻車馬炮，要贏「日耳曼兵團」，真係難過登天！
中堅比併：大衞雷斯

上陣時間：480分鐘

場數：5場

入球：2球

傳球次數：250次（77.6%）（成功率）

犯規：9次

平均成功解圍：3次

最高跑動時速：27.94公里

平均跑動距離：8971.2米

平均個人衝刺：23.8次
中堅比併：曉姆斯

上陣時間：343分鐘

場數：4場

入球：2球

傳球次數：253次（83.4%）（成功率）

犯規：4次

平均成功解圍：1.25次

最高跑動時速：29.05公里

平均跑動距離：9388.5米

平均個人衝刺：23.25次
Data King：雙方對碰場均入3球

‧巴西自02年世盃後，已直落41場主場賽事不敗。

‧史高拉利帶領巴西踢過兩次世盃決賽周（02年及今屆），未試過輸波。

‧近3屆闖入4強賽事全開細，法定時間只攻入3球，失1球。

‧兩隊歷史上對賽21次，合共攻入63球，平均每場入3球。
Data King：德國慢熱旺開半細

‧高路斯只要喺決賽周有波入，就可超越朗拿度嘅15球入球紀錄。

‧自東西德統一後，與「森巴兵團」對賽9次，錄得2勝2和5負，並開出7次入球大。

‧近3屆闖入4強賽事全開細，法定時間內攻入1球，失1球。

‧近8場比賽成績，7度開半場細。
乜都玩錦囊：德國5.3倍讓客抵博

巴西今場除咗王牌尼馬因傷緣盡世盃外，仲有後防支柱堤亞高施華坐波監。德國雖然喺今屆表現唔算係上佳，但要K.O.冇晒重心嘅「森巴兵團」可以話係易如反掌，5.3倍嘅「讓客」真係筍到爆。