阿根廷食橙因住骾親

猪拉多纳

冇迪馬利亞 美斯一個搞唔掂

世盃4強大戰，荷蘭同阿根廷今晚喺聖保羅哥連泰斯球場爭奪決賽入場券。阿根廷過去4次殺入準決賽從未失手，每次都能殺入決賽，不過今次遇上有「戰術大師」尹戈爾領軍嘅荷蘭，喺失去迪馬利亞兼阿古路同希古恩都缺態嘅情況下，單靠美斯一人之力，要喺法定時間之內解決對手唔容易，阿根廷讓平半，波童捧下盤。

（無綫翡翠台及明珠台、TVB13及19、now 818及840周四凌晨4時直播）
4入準決賽全晉級

阿根廷曾於30、78、86及90年4度打入世盃4強，結果全部順利過關，從數據上睇似乎極有機會再闖決賽。不過，原來阿根廷史上8次面對荷蘭錄得4和4負，而且從未試過喺法定時間之內擊敗過對手，唯一一次贏波係78年世盃決賽，阿根廷踢到加時以3比1勝出捧盃，之後兩軍分別於98及06年兩屆決賽周再碰頭，荷蘭於98年8強勝2比1，然後06年分組賽打和0比0，所以計往績荷蘭絕對唔輸蝕。

講完歷史再睇番雙方今屆表現，阿根廷翼鋒迪馬利亞對比利時受傷，今仗肯定無法披甲，為球隊爭勝添上不明朗因素。阿根廷今屆戰術單調，攻勢主要倚靠美斯、迪馬利亞發動，今仗後者倦勤，美斯勢必成為眾矢之的，一旦被凍結進攻隨時癱瘓。前鋒阿古路據報已傷愈候命，但預計狀態唔會十足，剛打破國際賽入球荒嘅希古恩表現亦太過飄忽，喺前線未必幫到手。阿根廷今屆踢咗5場比賽4勝1和，要留意佢哋從未試過先失波，應付逆境波嘅能力仍有待證明。相反荷蘭今屆先後反勝西班牙、澳洲及墨西哥，領隊尹戈爾嘅調兵遣將及臨場應變獲得各界高度評價。
荷蘭抗逆能力超強

或者有球迷認為傳媒將尹戈爾過於「神化」，但無可否認，荷蘭嘅板櫈深度及臨陣變招確比阿根廷優勝，就算落後都有一定反撲能力。荷蘭上圈面對哥斯達黎加雖然踢足120分鐘都入唔到波，但其實演出唔差，尹佩斯、史奈達都有可置對手於死地嘅埋門機會，如非對手門將演出神勇及欠運，荷蘭早已入波晉級。

加上橙軍中有唔少後生仔，去到比賽末段依然「段段有」，今場仲要安排喺當地時間接近黃昏開波，避開下午嘅炎熱天氣，更有利歐洲球員發揮。波童認為荷蘭至少可在法定時間之內保持不敗，受讓平半捧下盤。
卡基反英判官派黃不手軟

國籍：土耳其

年齡：37

曾執法大賽：歐聯及歐霸盃、11世青盃、12歐國盃及世冠盃

簡介：從事保險工作嘅卡基被視為「反英」判官，事關他曾多次於歐洲賽主吹英格蘭球會嘅比賽中出示紅牌。今屆佢暫時吹過巴西對墨西哥互無紀錄，以及阿爾及利亞1比1打和俄羅斯嘅分組賽雖然冇見紅，但合共出示9張黃牌，可見佢嘅執法尺度都頗緊，只係於「阿俄戰」中，阿軍球迷不斷用激光筆射向俄羅斯門將艾堅菲夫塊面，後者受干擾下導致出迎判斷錯誤而失波，賽後俄軍主帥卡比路認為呢球應該唔算數，仲鬧爆卡基「發雞盲」。

執法場數：83

黃牌數：341

平均黃牌：4.11

紅牌數：17

平均紅牌數：0.20

判12碼：22

平均判12碼次數：0.27
今屆執法：

6月18日　A組 巴西 Vs 墨西哥

6月27日　H組 阿爾及利亞 Vs 俄羅斯

今屆派牌：黃：9 紅：0
荷蘭往績佔優僅78年決賽加時飲恨

荷蘭同阿根廷從來都係世盃爭標分子，而兩軍喺決賽周更總共遇上4次，絕對稱得上係老對手。呢4次對碰中，荷蘭喺法定時間內都能夠保持不敗，以2勝2和嘅成績壓住阿根廷，不過佢哋唯一失利嘅正正係最重要嘅一場，1978年嘅決賽，雙方90分鐘打成1比1，結果加時荷蘭連失兩球，痛失錦標。

事實上，論整體對賽往績，荷蘭以4勝3和1負嘅成績佔優，足見「橙軍」對住阿根廷有一定把握。不過值得一提嘅係，兩軍對上一次交手已經係06年，當時雙方互交白卷，近6次對賽中荷蘭贏出咗兩次，比數皆為一兩球上落，反映雙方實力接近。
荷蘭

主要後備：17謝明蘭斯(前鋒)、19亨特拉爾(前鋒)、21迪比(前鋒)、18利萊費亞(中場)、7真馬特(後衞)

入球球員分布：尹佩斯、洛賓(3球)、迪比(2球)、迪維積、利萊費亞、史奈達、亨特拉爾(各1球)

入球時間分布：1-15分鐘(0)、16-30分鐘(1)、31-45分鐘(1)、46-60分鐘(2)、61-75分鐘(3)、76-90分鐘(5)
阿根廷

主要後備：20阿古路(前鋒)、18柏拉斯奧(前鋒)、5加高(中場)、19列卡度艾華利斯(中場)、17費達歷高費南迪斯(後衞)

入球球員分布：美斯(4球)、迪馬利亞、馬高斯盧祖、希古恩（各1球）、對方烏龍球（1球）

入球時間分布：1-15分鐘(3球)、16-30分鐘(0球)、31-45分鐘(1球)、46-60分鐘(1球)、61-75分鐘(1球)、76-90分鐘(1球)、加時(1球)
笛子波童推介：荷蘭下盤