荷蘭Vs阿根廷 半場和鬥後勁

猪拉多纳

話咁快世盃就嚟到4強，真係有啲唔捨得。今晚深夜上演嘅荷蘭對阿根廷，「橙軍」有連場出奇招扭轉戰局嘅尹戈爾領軍，就算兩大主力洛賓同尹佩斯齊齊跌Watt都冇有怕。同樣阿根廷雖有迪馬利亞因傷缺陣，但好在仲有阿古路及時傷愈，睇怕兩隊未鬥到最後一刻都未知鹿死誰手，博1.95倍半場和啱數。

（無綫翡翠台、明珠台、TVB13及now818台、中央5台周四凌晨4:00直播）

嚟到4強激戰一場定生死，贏波嘅都可能會淚流滿面咁走人，講緊嘅就係「天使」迪馬利亞。阿根廷上場以1:0淘汰比利時，但「天使」喺上半場一次攻門後傷出，事後證實大腿肌肉撕裂，離場嗰陣可能佢自己都知大劑，忍唔住喊到飛起，勁陰功！梗係啦，話晒佢係阿根廷入8強嘅功臣，唔係佢加時入波搞掂瑞士，最後邊隊晉級都唔知呀！
阿古路密集治療復出

冇咗最幫得手嘅迪馬利亞，咁美斯點算呀？好在喺分組賽受傷嘅阿古路經過密集式嘅「高壓氧氣艙」治療後已經閃電康復，呢場好大機會披甲上陣。有佢拍住美斯，荷蘭班後衞仲唔進入十級戒備咩？起碼上半場唔敢大意輕出，守住嚟踢先啦！

咁荷蘭又點呢？「橙軍」上場靠互射12碼淘汰哥斯達黎加，大家可能認為救出兩球嘅後備門將告魯爾係最大功臣，但其實夠「吉士」喺完場前換告魯爾入去嘅領隊尹戈爾，佢嘅功勞先最大，唔止對隊員嘅實力同特性好清楚，加埋彼此嗰種信任，先得出個咁正嘅結果。尹帥有料呀！曼聯有救喇！哈！哈！
尹戈爾有後着半場唔搏

其實16強對墨西哥嗰陣，荷蘭喺落後一球下換入亨特拉爾，結果佢交出一個助攻同一個入波，幫荷蘭反敗為勝。尹戈爾Keep住有奇招，同時反映佢對球隊後上殺着好有信心，既然係咁自然唔會急住喺上半場就求勝，睇定啲同阿根廷慢慢鍊過，半場和真係幾好路喎！
門神對決：羅美路

代表國家隊上陣：52次

年歲/場數：27/5

上陣時間：480分鐘

平均成功撲救：2.8次

平均撲救率：82.4%

犯規次數： 0

傳球次數（成功率）：130次（72.3%）

平均跑動距離：3263.4米
施利臣

代表國家隊上陣：13次

年歲/場數：25/5

上陣時間：480分鐘

平均成功撲救：2.4次

平均撲救率 75%

犯規次數：0

傳球次數（成功率）：168次（72.6%）

平均跑動距離：5131.8米
Data King：荷蘭旺開半場和

‧荷蘭近10場比賽取得6勝3和1負。

‧喺今屆世盃踢過5仗，連開5口半場和。

‧歷史上曾8次鬥阿根廷，取得4勝4和。

‧近2屆打入4強賽事（2010年、1998年），2場皆開半和（1:1、0:0）。
Data King：阿根廷近10戰7勝

‧阿根廷近10戰取得7勝3和不敗成績。

‧近8仗開咗7次半場和。

‧與荷蘭8次對賽，兩軍共入18球，平均每場入2.25球。

‧近2屆打入4強（1990年、1986年），2場皆開全場細，總入球都係2球。
乜都玩錦囊：高手過招博半場0:1

到目前為止，荷蘭5場世盃比賽，都未曾試過喺換邊前領先；對家阿根廷，雖然近5戰有3場波喺半場取得領先優勢，但全部都係僅咧1粒，既然半場細熱到得1.3倍，咁倒不如玩個阿根廷半場贏0:1波膽，有3.85倍，一試無妨。