巴西荷蘭大騷謝幕

猪拉多纳

阿三之爭冇壓力 預咗攻得好開放

季軍波，開大多！今晚上演世盃季軍戰，巴西於巴西利亞市國家球場火併荷蘭，爭逐第3名。貴為東道主，「森巴兵團」上仗慘遭德國羞辱，為挽回面子及向國民交代，以免國內不滿情緒進一步爆發，呢個安慰獎絕對要拿下，而因傷緣盡世盃嘅王牌尼馬亦會入場打氣，對士氣會起刺激作用。荷蘭領隊尹戈爾喺4強輸波後講到明季軍戰毫無意義，但今仗始終係佢嘅國家隊告別戰，橙軍眾將都想用勝利歡送老帥，再睇番近9屆季軍戰例演入球騷，再追大盤都好正路。

（TVB 13及19、now 818及840周日凌晨4時直播）
尼馬撐場 撫國民傷痛

東道主巴西上仗4強畀德國大炒七個一皮，被視為國恥，賽後代隊長大衞雷斯對未能將快樂獻畀受煎熬嘅同胞，含淚道歉，呢場「明尼路之痛」更觸發當地多個城市暴動，可見國民對佢哋寄予厚望。不過波已輸，一切已經返唔到轉頭，巴西球員惟有收拾心情備戰呢場季軍戰，隊長堤亞高施華今仗刑滿復出，因腰椎骨裂而緣盡世盃嘅王牌尼馬亦會喺今仗會隨隊撐場，故巴西對季軍嘅渴求唔使懷疑，森巴兵今仗會以最強人腳出戰，踢番場爭氣波攞番個彩，為國民同尼馬帶來一絲安慰。

荷蘭上仗互射12碼不敵阿根廷，領隊尹戈爾及翼鋒洛賓都話季軍對佢哋毫無意義，預計後者和隊長尹佩斯、尼祖迪莊等老將未必會披甲，正好畀一班生牯仔吸取經驗，今屆荷蘭除打起咗戴利白蘭特、馬田斯恩迪、真馬特、迪維積、迪比外，後備嘅佐迪卡斯、利萊費亞、謝明蘭斯等潛質唔曳，相信領隊尹戈爾今仗會派晒佢哋落場，另外喺8強立下大功嘅門將告魯爾同後備殺手亨特拉爾料會正選披甲。
數據堅挺 近9屆全開大

由於新球季尹戈爾將會執教曼聯，即係話今仗係佢最後一次帶領「橙軍」，眾將勢必搏盡爭勝歡送呢位老師，最重要係呢類賽事無關痛癢，喺冇晒心理包袱下踢得更開放，防守又唔會太嚴密，更加有利製造士哥，睇番自78年起近9屆季軍戰全部開大，數據堅挺，既然雙方都想贏波必定搶攻，預計會合演入球騷，大盤真係有買趁早。
海默迪吹季軍戰 非洲第一人

國籍：阿爾及尼亞

年齡：43

曾執法大賽：非國盃（2008、2012、2013）、2011世青盃、2012世冠盃

簡介：今場執法球證係來自阿爾及利亞嘅海默迪，成為史上首位主吹世盃季軍戰嘅非洲球證。海默迪今屆曾執法分組賽澳洲對荷蘭、哥斯達黎加對英格蘭及16強比利時對美國，一共發出7面黃牌。值得一提，負責主吹今屆揭幕戰巴西對克羅地亞嘅日本球證西村雄一將會出任今場第四球證，西村喺嗰場比賽嘅下半場判咗個問題12碼畀巴西，直接令巴西獲得領先機會，如果臨場有球證頭暈身o架，西村有機會落場唔知會否對巴西有利呢？

執法場數：68

黃牌數：225

平均黃牌：3.31

紅牌數：10

平均紅牌數：0.15

判12碼：16

平均判12碼次數：0.24
今屆執法：

6月19日 B組 澳洲 Vs 荷蘭

6月25日 D組 哥斯達黎加 Vs 英格蘭

7月2日 16強 比利時 Vs 美國

今屆派牌：黃：7　紅：0
對賽往績好接近上屆8強戰橙軍勝

論對賽往績，巴西同荷蘭可以話係完全打個和，喺11次對賽中，大家都錄得3勝5和3負嘅成績之餘，就連入球數字都一樣，大家都攻入對方15球，觀乎歷來嘅比數，都不過一兩球上落，加上雙方近6次相遇有4次都分唔到勝負，可見兩隊賽力非常接近。

另兩軍喺世界盃決賽周總共對過4次，荷蘭以2勝1和1負佔優，不過喺98年法國決賽周同對手打和之後，互射12碼以2比4落敗，值得留意。然而喺上屆8強戰，荷蘭就憑史奈達連下兩城，以2比1反勝巴西進身4強。
巴西

主要後備：13丹迪(後衞)、18靴蘭尼斯(中場)、8荷西保連奴(中場)、9費特(前鋒)、7侯克(前鋒)

入球球員分布：尼馬(4球)、大衞雷斯、奧斯卡杜斯山度士(各2球)、費特、費蘭甸奴、堤亞高施華(各1球)

入球時間分布：1-15分鐘(1球)、16-30分鐘(3球)、31-45分鐘(1球)、46-60分鐘(1球)、61-75分鐘(2球)、76-90分鐘(3球)
荷蘭

主要後備：12華希亞治(後衞)、8約拿芬迪根斯文(中場)、15古積特(中場)、9尹佩斯(前鋒)、11洛賓(前鋒)

入球球員分布：尹佩斯、洛賓(各3球)、迪比(2球)、迪維積、利萊費亞、史奈達、亨特拉爾(各1球)

入球時間分布：1-15分鐘(0)、16-30分鐘(1)、31-45分鐘(1)、46-60分鐘(2)、61-75分鐘(3)、76-90分鐘(5)
法達斯維推介：入球大