鹽湖城作客銀河未驚過

猪拉多纳

兩世盃腳歸隊戰力回穩

美職常規賽已經踢咗一半，上季喺西岸排第三嘅洛杉磯銀河，今季表現令人失望，正為季後賽資格苦苦掙扎，聽朝呢支名牌球隊將喺主場迎戰皇家鹽湖城，實在讓唔起對手，皆因鹽湖城有兩大主將回歸助陣，今場讓球客勝唔怕追。

（TVB 301周日早上10時30分直播）

今場會係皇家鹽湖城第三次、亦係今季最後一次喺常規賽同洛杉磯銀河碰頭，鹽湖城對上兩戰銀河取得一勝一和，如果今場作客能夠保持不敗，將係球隊史上第二次喺常規賽入面未輸過畀銀河。

鹽湖城今場當然有本錢達到呢個里程碑，兩大主將隊長碧卡文同門將利文度上場一復出即助3連敗嘅鹽湖城止血成功，自從佢兩個喺5月中旬離隊，代表美國出戰世界盃後，鹽湖城嘅成績就一落千丈，喺美職嘅不敗嘅走勢亦都被終止，依家有番呢兩大猛將，戰鬥力即時上升，今場受讓值捧。

洛杉磯銀河雖已連續8場不敗，但表現唔算太標青，上場主場對波特蘭伐木者仲差啲輸埋，主力前鋒羅比堅尼又狀態低迷，要贏到皇家鹽湖城真係唔易，奉勸各位唔好盲目相信名牌！
紅牛跌Watt撐機員

再講埋另一場早場直播賽事畀大家參考吓，紐約紅牛主場對哥倫布機員。同洛杉磯銀河一樣，上季東岸冠軍紐約紅牛今季大跌Watt，近期狀態勁曳，近八仗僅得一勝，今場一於捧受讓嘅哥倫布機員！

（TVB 301周日早上7時直播）