日皇盃秋田去東京偷雞

猪拉多纳

世盃踢埋今明兩晚比賽便會圓滿結束，晏晝可以玩下日本天皇盃當熱身，今日七場受注賽事阿King重心推介丙組隊伍秋田藍閃電可以弱勝強，作客近年唔多重視盃賽嘅FC東京有雞偷，敲讓球客勝。

FC東京雖然比今場對手秋田藍閃電聯賽排名高兩級，不過佢哋喺盃賽場合常以副選出戰，水準唔穩定之餘，爭盃決心亦一般，佢哋除咗近三場日聯盃全部輸晒，過去兩季喺日皇盃第二圈兩對更低組別嘅橫河武藏野都冇甜頭，前季主場輸0比1，上季亦要踢到加時至險勝1比0過關，大熱倒灶有迹可尋。秋田藍閃電過去一個月Keep住有比賽，上一圈大炒埼玉7比1料對球員信心有正面幫助，而且狀態亦肯定比一個月冇正式比賽嘅FC東京好，讓球主客和開出FC東京讓二球過晒火位，2.55倍讓球客勝好抵玩。
德島冇鬥心捧鹿兒島

另外兩場賽事，德島漩渦主場鬥第四級別聯賽嘅鹿兒島聯，德島漩渦目前喺日職排包尾，聯賽都踢唔掂邊有心情爭盃賽？球隊今季聯賽連盃賽踢咗二十場只得一勝兩和十七負，輸波率逾八成，主場出擊都信唔過，敲讓球客勝。最後磐田山葉主場鬥丙組中游藤枝MYFC，磐田山葉今季降落乙組表現冇太大走樣，呢場爆冷機會較微，但考慮到磐田山葉今季以重返日職為首要目標，盃賽未必會去盡，今場料小勝居多，呢場一於揀細盤。