巴荷對攻有睇頭

猪拉多纳

趁機騷Off唔再出醜

過埋呢兩晚，又要等四年先至有世界盃睇喇，雖然話唔使再捱夜，但係點都有啲唔捨得，所以今晚嘅季軍戰同聽晚場決賽，都要好好享受最後呢兩場波嘅每分每秒！特別係今晚巴西對荷蘭場季軍戰，一定多波入，夠精彩！

講到今晚嘅季軍戰，預計主辦國巴西同上屆亞軍荷蘭都會放開嚟踢，入波應該唔會少。可能唔少球迷都會覺得季軍戰無乜意義，洛賓喺上場輸波後都話，捧唔到「大力神盃」，拎季軍同第四都冇咩分別！不過，小弟又唔係咁睇，尤其對巴西嚟講，上場歷史性喺主場輸七個一皮，喺全世界面前出晒醜，今場點都要盡力踢番場好波挽面子，亦要氹番上場心都碎晒嘅粉絲至得！

對荷蘭嚟講，就算三十歲嘅洛賓唔Care，一班廿歲出頭嘅年輕球員都會想博下表現嘛。話晒都係世界盃舞台，有得上場就點都會攻番夠本，所以大家今晚等睇入球大戰都得喇！
德國愈踢愈有默契

至於聽晚嘅決賽呢，我當然睇好踢法亮麗嘅德國啦！冇錯，世界盃歷史上從未試過有歐洲球隊可以喺南美洲封王，但小弟就睇好德國可以打破呢個「魔咒」。雖然「日耳曼戰車」上場之所以大炒巴西，其中一個原因係對手冇咗尼馬、堤亞高施華兩名大將，但起碼睇得出佢哋已經踢出默契，而且任何一個中前場球員都可以分擔攻擊責任。

阿根廷後防係就係夠穩陣，前線亦都星光熠熠，不過喺今屆賽事，幾乎都無見過任何漂亮嘅組織攻勢，一旦美斯好似上場對荷蘭咁畀人睇到實一實，其他球員基本上咩都做唔到！我就梗係希望德國踢出氣勢，力挫呢隊名不副實嘅阿根廷啦！