諾在其中（馮諾嘉）閒話一句奪標機高

不死鸟

剛過去的周日可能因天雨關係，三T尾兩關爆出過千蚊Q，結果當然係冇人中，近二千萬嘅多寶順理成章撥入今期三T，另外六環彩同第二口孖T都有多寶，估計可以吸引到唔少馬迷投注

　　天文台預測周日大致天晴，到時應該冇雨落，希望賽果正頭正路啲。周日沙田十一場賽事，頭場係拍賣會五月挑戰賽，呢場千二米賽事有多匹新馬角逐，其中小妹最鍾意梁定華馬房隻「金堡龍華」。此駒上仗初出跑同程，抽得十檔起步兼沿途走二叠蝕位，最終仍以頸位壓倒「虎虎生輝」贏馬，兼且彈甩第三、四名嘅「智友」同「百利高」超過兩乘，早已反映出實力唔簡單。

　　今場「金堡龍華」再跑千二米，再遇蹄下敗將「智友」、「百利高」，估計後兩駒應難反先。至於同場嘅「好運精選」、「駿方」同「旅遊大亨」，上仗連「百利高」都跑唔贏，估計更加唔係「金堡龍華」手腳，後駒可作今場馬膽。

信白德民揀馬眼光

　　至於第八場二千四百米遮打盃，只得八匹參戰馬角逐，馬少場合大摩仲派出三駒上陣，睇嚟志在必得。「爆冷」季內成績不俗，七戰獲三勝三位，其中六仗由白德民操刀，但今場騎者卻揀騎廐侶「閒話一句」，唔知係咪佢認為呢匹七歲馬年紀已經開始大呢﹖睇番「閒話一句」上仗跑千六米的確係嫌短多少，今次增程跑二千四百米好跑得多，小妹相信白德民嘅揀馬眼光，一於支持「閒話一句」。