拍賣馬賽忽然熱鬧

不死鸟

過去季尾時份，新一屆馬會拍賣會馬挑戰賽，出賽馬往往相當疏落，點知呢個禮拜08/09拍賣會馬五月挑戰賽，竟多達15駒報名，究竟做咩忽然間咁熱鬧呢？此類賽事一向以頂班獎金掛帥，頭馬高達91萬，馬主佔70%都有63萬，此情況與上季甚至前季並無分別，唯一解釋，只可以話今季呢批馬特別早熟，可以快啲跑，事實又的確係咁，除咗隻「特權」之外，其餘每一隻都已經上過陣，既然有份跑就有機會，跑入前5名獎金都唔錯，咁可跑則跑，換轉我有隻拍賣會馬，都有興趣響度博吓大霧。
邊隻贏面最高Helen唔敢講，但就有少少資料畀大家參考，記得上年12月拍賣會舉行前，Helen同兩個老友，在一位騎師陪同下睇各駒試跑，騎師冇講邊隻最鍾意，但就講咗兩個number唔多睇好，分別係「質超駒」及「駿方」，後駒一出得第三，有冇跌眼鏡？今次將有些少眉目。