德國阿根廷細紀決戰

猪拉多纳

睇定嚟食 Vs 防守穩健

世盃今晚上演王者戰，德國同阿根廷新仇舊恨一朝了！雖然德國上仗大勝巴西，但嚟到決賽呢啲咁重要嘅關頭，以「日耳曼兵」嘅大賽經驗，點會同你喪攻？況且「潘帕斯雄鷹」條防線超穩陣，兩軍好大機會只係一球上落，與其硬捧一隊，倒不如玩1.52倍入球細仲實際！（無線翡翠台、明珠台、TVB13及now818台、中央5台周一凌晨3:00直播）

「日耳曼兵團」喺4強之所以能夠大炒巴西7:1，其實都係多得「森巴兵團」輸完第1球波之後成隊散晒，尤其係代隊長大衞雷斯咧唔到班隊友，先有咁多空位畀德國球員入楔，最終咪出現呢個舉世震驚嘅戰果囉。雖然阿根廷前鋒阿古路日前長他人志氣，話「日耳曼兵團」邊隊都炒得起，但我絕對唔認同呢點，至少德國要炒阿根廷，就已經係一件勁難嘅事喇！
德國求破宿命 唔敢亂攻

計埋分組賽，「潘帕斯雄鷹」至今6戰只係失咗3球，有2球仲要係豪畀尼日利亞嘅，防守真係穩健到得人驚！雖然德國依家士氣高漲，而且又冇任何傷停問題困擾，但係阿根廷只要肯守，德國要入波一啲都唔易。再者，「日耳曼軍」班球員大賽經驗豐富，嚟到決賽，當然會慢慢睇定嚟食，使乜同你玩急攻？況且德國對上3屆世盃都係臨門一腳「撻Q」，同冠軍失諸交臂，今次班球員要肩負打破二奶宿命嘅重任，可能會踢得更緊張！

對面嘅阿根廷，成班球員都係第一次殺入世盃決賽，所以未必會太進取，務求頂住「日耳曼兵團」攻勢先再謀後着。不過，佢哋有美斯、阿古路同希古恩3件巨星喺前線，德國仲點敢谷得太上呀？照咁計，今場入波應該唔多，隨時又要加時或者12碼先分到勝負，一於揀入球細啦！