沾手毒品無運行

猪拉多纳

　　拍戲扮惡人扮到出晒位嘅張耀揚，喺北京藏毒事件全面曝光，判刑孰輕孰重就後話，其實所謂毒品，係好多年青人認為普通不過嘅大麻，但在港尚且犯法，喺大陸斷正，就更加唔可能當冇事發生；講真，唔好理係邊一瓣，三歲小朋友都知呢家嘢有害無益，絕對係揩吓都唔得，硬要撼頭埋牆的話，總之後果自負。

　　正因為毒品累人無遠弗屆，馬圈前線如杜利萊、白布朗、徐君禮、梁家偉都曾經衰過，咁幕後如馬伕、騎馬人沾上劣習，都唔可以從輕發落，過去幾年，就有好幾位high完返工，偏偏又咁唔好彩被禁毒小組捉到正。所謂high，如果純粹酒氣未散，會被停薪留職14日，萬一衰毒品，馬會方面絕不姑息。

　　以過去相同個案判例睇，馬房工作範圍冇得留低就梗架喇，好彩嘅會被調去其他部門，唔好彩就會被要求自動辭職，但會照勞工法例補償，問題係做開馬圈，出咗去唔知做得乜，就算留喺馬會，轉職一定搵唔番同等人工，呢個代價係就係好大，但有衰自己攞嚟，試問又怪得邊個？

　　莊美倫