紐約紅牛大鬧費城

猪拉多纳

多得啱啱踢完嘅世界盃，令波友嘅暑假餓波「刑期」縮短。喺主流聯賽停戰下，各位不妨學球員一樣抖抖先，為下季儲定彈藥。但鍾情美職嘅朋友就唔使驚悶，費城聯聽朝喺主場鬥紐約紅牛，前者換帥表現明顯有改善，後者有射手巴利胡禮菲臘斯着晒火，捧1.62倍入球大最抵玩。

（TVB301周四早上7:00直播）
卡希爾 亨利拱照胡禮菲臘斯

費城聯今年開季勁曳，結果喺上個月初終於炒領隊，改由助教古亞甸做暫代領隊，隊波隨即反底，之後6仗取得2勝3和1負成績，仲幫球隊殺入美職盃4強。上仗唔係中場拿侯特領紅要打少個，佢哋早就攞到今季首次2連勝。依家班波明顯回勇，想連續12仗有波入根本唔係咩難事。

至於紐約紅牛就有射手巴利胡禮菲臘斯Fit到爆，連續3仗「士哥」之餘，目前更以15球「士哥」排喺聯賽射手榜首位，為咗拋甩對手今仗肯定繼續數胡。呢位曼城青訓產品仲有前英超名將亨利幫手鋪橋搭路，齋睇亨利上場更交出1入球3助攻嘅成績就知佢寶刀未老，再加埋喺世盃射入金球嘅澳洲中場卡希爾，試問費城聯睇得邊個先？